Финляндия Европа Иттифоқининг олтинчи санкциялар пакетига мувофиқ, Россиядан кучли спиртли ичимликлар олиб киришни тақиқлади. Бу ҳақда Yle телеканали Финляндия божхона хизматига таяниб хабар берди.

Финляндия божхона бошқармаси катта инспектори Яркко Кескиненнинг тушунтиришича, гап ароқ, ликёр, «жин» ва виски импортини тақиқлаш ҳақида бормоқда. Пиво, сидр ва вино каби паст алкоголли ичимликларга санкциялар таъсир қилмади.

Кучли спиртли ичимликларни ҳам хусусий, ҳам тижорат импортнинг бир қисми сифатида олиб кириш тақиқланади. Тақиқ истисноларни, шу жумладан спиртли ичимликларни шахсий истеъмол учун ташишни назарда тутмайди.

Бундан ташқари, тақиқ Финляндия ва Россия чегарасида божсиз сотиб олинган ичимликларга ҳам тегишли.

Маълумот учун, Финляндия Европа Иттифоқи мамлакатлари орасида Россия билан қуруқликдаги энг узун чегарага эга давлат ҳисобланади.

Эслатиб ўтамиз, Россия 21 май куни Финляндияга ҳам газ етказиб бериш ишларини якунлади.

Аввалроқ Финляндия ва Гибралтарда санкцияларга учраган россиялик тадбиркорларга тегишли 22 та яхта ҳибсга олинганди.