7 сентябрь куни «Ипак йўли» халқаро туризм ва маданий мерос университетида Биринчи Ўзбекистон–Исроил академик форуми бўлиб ўтди.

Мазкур форумда Ўзбекистон Республикаси Бош вазири ўринбосари – Туризм ва маданий мерос вазири, «Ипак йўли» халқаро туризм ва маданий мерос университети ректори Азиз Абдуҳакимов, Олий Мажлис Сенати аъзоси, профессор Рустам Холмуродов, Самарқанд давлат университети ректори, Исроилнинг Ўзбекистон ва Тожикистондаги элчиси Бен-Ҳиллел Зеҳавит хоним, Холон технология университети ректори профессор Эдуард Якубов ва Холон университети профессорлари иштирок этди.

Азиз Абдуҳакимов форумни расман очиб бераркан, Исроил олий ўқув юртлари, жумладан, Холон технологик университети билан келажакдаги ҳамкорлик муҳимлигини таъкидлади. Ректор Исроил ва Ўзбекистон олий таълим муассасалари ўртасида таълим соҳасидаги ҳамкорлик алоқаларини ривожлантириш суръатларини оширишга алоҳида эътибор қаратиб, бунда талабалар алмашинуви, қўшма таълим дастурлари ва илмий лойиҳалар устида иш олиб борилаётгани муҳим эканлигини таъкидлади.

Бундан ташқари, Азиз Абдуҳакимов Ўзбекистонда туризм соҳасида амалга оширилаётган ислоҳотлар, ШҲТ саммити арафасида Ўзбекистон Республикаси Президенти Шавкат Мирзиёев раҳнамолигида Самарқанд руҳини акс эттириш бўйича амалга оширилаётган кенг кўламли ишлар ҳақида гапирди.

Холон технологик университети ректори профессор Эдуард Якубов ўз нутқида барча форум иштирокчиларига миннатдорлик билдириб, Исроил ва Ўзбекистон ўртасидаги ўзаро ҳамкорлик туризмни ривожлантириш ва икки мамлакат ташқи иқтисодий алоқалари учун юқори малакали кадрлар тайёрлашга қаратилганлигини таъкидлади.

Биринчи Исроил-Ўзбекистон академик форуми маданий мерос ва туризм, инновацион технологиялар, ахборот, компьютер ва музей технологияларига бағишланди.

Ушбу форумнинг мақсади Исроил, БАА ва Марказий Осиё давлатларидан олий таълим, саноат ва жамият вакилларини ҳамда инновациялар, академик доиралар, саноат, соғлиқни сақлаш ва атроф-муҳит соҳаларидаги Ўзбекистоннинг юқори мартабали вакилларини бирлаштиришдан иборат.

Конференция иштирокчилари ҳамкорликни янада ривожлантириш, фан ва технология, сунъий интеллект, машиналарни ўрганиш ва катта ҳажмдаги маълумотларни таҳлил қилиш ҳамда амалий математика, рақамли тиббий технологиялар, маданий мерос ва туризм, таълим, электрон таълим технологиялари ва бошқа соҳаларда янги тенденциялар борасида фикр алмашишди.

Маълумот учун, Биринчи Ўзбекистон-Исроил академик форумининг аллақачон Тошкент ва Бухорода ўтказилгани муҳим аҳамиятга эга.