Ўзбекистонда экспорчилар муаммоларини ўрганиш учун «1094» рақамли колл-марказ ташкил этилади. Бу ҳақда Президент томонидан ўтказилган видеоселектор йиғилишида маълум қилинди.

Қайд этилишича, ўтказилган учрашувларда ҚҚСни қайтаришда муаммолар борлиги аниқланган. Шу муносабат билан уларга ҚҚСни қайтариш бўйича соддалаштирилган механизм жорий этилиб, 80 фоиз маблағ қўшимча текширувларсиз 7 кун ичида қайтариб берилади.

Бундан ташқари, экспорчиларнинг масалаларини доимий ўрганиб, уларни тезкорлик билан ҳал қилиш бўйича узлуксиз ва доимий ишловчи штаб тузилади, «1094» рақамли колл-марказ ташкил этилади.

Президент ер участкаларини аукционга чиқариш муаммосига тўхталди. 

Масалан, 35 мингта ер участкаси электрон тизимга киритилгани билан бугунги кунга қадар Навоий, Сирдарё, Тошкент вилоятлари ва Тошкент шаҳрида бирорта ер участкаси аукционга чиқарилмагани кўрсатиб ўтилди.

Ҳокимликлар, қурилиш ва архитектура идоралари масалага юзаки қараётгани таъкидланди.

«Неча марта бу масала сизларга тушунтирилди. Тадбиркорлардан талаб катта, лекин, амалда ҳали натижа йўқ», — дея танқид қилди давлат раҳбари.

Аввалроқ Ўзбекистонда Россия, Украина ва Беларусь билан ишлаётга16н корхоналарга имтиёз берилиши маълум қилинганди.