Тижорат банкларига мобил иловалари орқали давлат хизматлари кўрсатишга рухсат берилади
Ўзбекистонда тижорат банклари, мобил алоқа операторлари ҳамда тўлов тизимлари операторларига мобил иловалари орқали давлат хизматлари кўрсатишга рухсат берилади.
Ўзбекистонда мобил алоқа операторлари, тижорат банклари ҳамда тўлов тизимлари операторларига мобил иловалари орқали my.gov.uz хизматларини кўрсатишга рухсат берилади. Бу ҳақда Ягона интерактив давлат хизматлари порталининг матбуот хизмати хабар берди.
Маълум бўлишича, Президентнинг «2022–2023 йилларда ахборот-коммуникация технологиялари соҳасини янги босқичга олиб чиқиш чора-тадбирлари тўғрисида»ги қарори имзоланган.
Ҳужжат билан 2022–2023 йилларда соҳани ривожлантиришнинг асосий вазифалари белгиланган. Унга кўра, 2022 йил якунига қадар аҳоли яшаш масканларини кенг полосали мобил алоқа тармоғи билан қамраб олиш даражаси 98 фоизга, халқаро аҳамиятга эга автомобиль йўллари бўйлаб юқори тезликдаги мобил интернет қамровини 60 фоизга етказилади.
Шунингдек, 2022 йил 1 ноябрдан мобил алоқа операторлари, тижорат банклари ҳамда тўлов тизимлари операторларига ахборот хавфсизлиги талабларига риоя этган ҳолда, ўзларининг мобил иловалари орқали Ягона порталдаги электрон давлат хизматларини кўрсатишга рухсат берилади.
Аввалроқ Ўзбекистонда чет тилини билиш даражасини аниқлаш имтиҳонларига онлайн ариза ягона интерактив давлат хизматлари портали орқали топширилиши хабар қилинганди. Таъкидланишича, хизматдан my.gov.uz орқали фойдаланилганда 10 фоиз чегирма мавжуд.