Тошкентда ерусти метроси остидаги жойлар сотувга қўйилади
Ҳужжат қонун ҳужжатлари маълумотлари миллий базасида эълон қилинган ва 2 июндан кучга кирди.
Тошкентда ерусти метро йўналишлари остидаги жойлар E-Auksion орқали сотувга қўйилади. Вазирлар Маҳкамасининг 01.06.2022 йилдаги «Тошкент шаҳрида барпо этилаётган ерусти метро линиялари остида жойлашган ер участкаларидан самарали фойдаланиш чора-тадбирлари тўғрисида»ги қарори қабул қилинди.
Ерусти метро йўналишлари остида жойлашган ер майдонлари хатловдан ўтказилган ҳолда уларнинг ерусти метро йўналишлари фаолиятига таъсир қилмайдиган қисми Тошкент шаҳар ҳокимлиги захирасига ўтказилади.
Ушбу ер майдонлари фудтрак ҳамда енгил турдаги қурилмаларни қуриш ва жойлаштириш учун E-Auksion электрон савдо платформаси орқали 5 йил муддатга ижара ҳуқуқи билан, истисно тариқасида, 12 ойда тенг улушларда бўлиб тўлаш шарти билан савдога чиқарилади.
Аукцион савдолари орқали олинган ер участкаларида савдо ва хизмат кўрсатиш, тайёр ҳолдаги овқатланиш маҳсулотлари билан савдо қилиш шохобчалари, китоб дўконлари, шунингдек, автотураргоҳлар ҳамда маданий ҳордиқ чиқариш ва спорт масканлари барпо этилади.
Маълумот учун, узунлиги 11,2 километр бўлган «Дўстлик-Қўйлиқ» ва 6,9 километр бўлган «Сергели-Олмазор» йўналишлари бўйича ерусти метро линияси барпо этилган ва фойдаланишга топширилган. Ҳозирги вақтда узунлиги 8,5 километр бўлган «Қўйлиқ-Қурувчилар» йўналишида қурилиш-монтаж ишлари олиб борилмоқда.
Тошкент метрополитенининг «Дўстлик-Қўйлиқ» ерусти метро йўналиши 1–5 бекатлари оралиғидаги ер майдонларидан самарали фойдаланиш мақсадида:
- пиёдалар ва велосипед йўлаклари;
- автотураргоҳлар;
- аҳоли сайр қилиши учун сайилгоҳлар;
- болалар ва спорт майдончалари ташкил этилади.
Ҳужжат қонун ҳужжатлари маълумотлари миллий базасида эълон қилинган ва 2 июндан кучга кирди.