Apple 2022 молиявий йилнинг биринчи чорагида рекорд даромад кўрди
Ҳисобот эълон қилингач компания акциялари яна 5 фоизга қимматлади.
Apple компаниясининг 2022 молиявий йилининг биринчи чорагидаги даромади 2021 йилнинг шу даврига нисбатан 11 фоизга ўсди. Компания рекорд даражадаги 123,9 миллиард доллар даромад қилди. Бу ҳақда компания сайтида эълон қилинган ҳисоботда сўз боради.
Қайд этилишича, Apple’нинг даромади таҳлилчилар кутганидан юқори бўлган. Корпорациянинг соф фойдаси қарийб 20 фоизга ошиб, 34,6 миллиард долларга етган.
АҚШда молиявий йил 1 октябрдан 30 сентябргача давом этади. Биринчи чорак эса 25 декабрда тугайди. Декабрь ойида талабнинг камайгани ҳақидаги хабарларга қарамай, Apple’нинг ушбу даврдаги энг кўп даромад келтирган маҳсулоти iPhone бўлди.
Ҳисоботга кўра, iPhone’нинг даромади ўтган йилга нисбатан 9 фоизга ошиб, 71,6 миллиард долларни ташкил этган. Mac сотуви компанияга 10,8 миллиард доллар (+25 фоиз) келтирган.
Маълум қилинишича, Apple бутун дунё бўйлаб сотувлар ҳажмининг ўсишига эришган. Аксарият маҳсулотлар Хитойда (20 фоиздан ортиқ) ва Осиё-Тинч океани минтақасида (19 фоиздан ортиқ) сотиб олинган. Савдо фақат Японияда пасайган (14 фоиз).
Мутахассисларнинг фикрига кўра, компания муваффақияти глобал таъминот занжирларидаги вазиятнинг яхшиланиши билан боғлиқ. Мисол учун, Тим Кук октябрь ойида таъминот билан боғлиқ муаммолар компаниясига 2021 йилнинг сўнгги чорагида 6 миллиард доллар зарар келтирганини айтганди.
Чип тақчиллиги энг кўп iPad планшетлари сотувига таъсир қилди, савдо 14 фоизга (7,2 миллиард долларга) камайган. Бироқ Кук бундай натижадан сўнг таъминот занжирини қайта ташкил этиш керак деб ҳисобламайди. Ҳисобот эълон қилинганидан сўнг, Apple акциялари 5 фоизга ўсди.
Аввалроқ Apple смартфонларга Face ID’дан ниқобли ҳолда фойдаланиш имкониятини қўшиши хабар қилинганди. Шунингдек, Apple iPhone’га карта тўловларини қабул қилиш функциясини қўшиши ҳақида хабар берилди.