Крипто-активлар айланмаси соҳасидаги провайдерларни лицензиялаш тартиби белгиланди
«Крипто-активлар айланмаси соҳасидаги хизматлар провайдерлари фаолиятини лицензиялаш тартиби тўғрисида»ги низом тасдиқланди. Ҳужжат билан лицензия талаблари ва шартлари, лицензия олиш учун тақдим этиладиган ҳужжатлар рўйхати белгиланди.
Истиқболли лойиҳалар миллий агентлиги директорининг 2022 йил 14 июлдаги буйруғи билан Крипто-активлар айланмаси соҳасидаги хизматлар провайдерлари фаолиятини лицензиялаш тартиби тўғрисидаги низом тасдиқланди. Бу ҳақда Агентлик матбуот хизмати хабар берди.
Маълум бўлишича, ҳужжат билан лицензия талаблари ва шартлари, лицензия олиш учун тақдим этиладиган ҳужжатлар, аризани кўриб чиқиш ва лицензия бериш ёки лицензия беришни рад этиш тўғрисида қарор қабул қилиш тартиби белгиланган.
Бундан ташқари, лицензияни қайта расмийлаштириш тартиби, лицензиянинг амал қилишини тўхтатиб туриш, тугатиш ва лицензияни бекор қилиш тартиби, лицензия талаблари ва шартларига риоя этилишини назорат қилиш тартиби ва бошқалар белгилаб олинган.
Қайд этилишича, янгиланган лицензия талаблари ва шартларига мувофиқ:
- лицензиялар фақат Ўзбекистон резидентлари юридик шахсларга берилади;
- крипто-биржалар устав жамғармасига (капитали), захирага қўйиладиган қисмига талаблар қисқартирилган;
- лицензия олиш учун талаб этиладиган ҳужжатлар рўйхати камайтирилган.
Шу билан бирга, жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасида халқаро стандартларининг (Жиноий фаолиятдан олинган даромадларни легаллаштиришга қарши курашиш бўйича молиявий чоралар ишлаб чиқувчи гуруҳнинг тавсиялари) талабларига мувофиқ баъзи чекловлар белгиланган.
Хусусан, террористик фаолиятда ёки оммавий қирғин қуролларини тарқатишда иштирок этган ёки иштирок этишда гумон қилинаётган ҳамда қатор жиноятларни содир этганлик учун судланганлиги олиб ташланмаган ёки ўталмаган шахслар томонидан лицензиатларни бошқаришга ва устав жамғармасида (капиталида) иштирок этишга йўл қўйилмаслиги айтилган.
Бундан ташқари, лицензиатларнининг устав жамғармасида (капиталида) оффшор ҳудудларда рўйхатдан ўтган компанияларнинг иштирок этиши тақиқланган.
Аввалроқ Ўзбекистонда крипто-активлар майнингини рўйхатдан ўтказиш тартиби тўғрисидаги низом муҳокамага қўйилгани хабар қилинганди. Лойиҳада майнингни амалга ошириш учун рухсат бериш талаблари ва шартлари акс этган.