АҚШ санкциялари таъсири. Huawei ўзининг сервер бизнесини сотади
Санкциялар бир вақтлар Хитойнинг энг йирик технология компанияси бўлган Huawei’га жиддий таъсир кўрсатмоқда
Huawei Technologies Co. сервер бизнесини сотиш бўйича «музокараларнинг илғор босқичида». Бу ҳақда Bloomberg вазиятдан хабардор манбаларга таяниб ёзмоқда.
Маълум қилинишича, Х86 сервер бўлинмасини сотиш мажбурийдир. АҚШ ҳукумати томонидан Huawei’га нисбатан жорий қилинган санкциялар доирасида компания Intel корпорациясидан ушбу серверлар учун процессорлар сотиб олиш имкониятидан маҳрум бўлди.
Huawei сервер бизнесининг потенциал харидори камида битта давлат компанияси — Huawei’нинг сервер ишлаб чиқариш бўйича ҳозирги ҳамкори Henan Information Industry Investment Co. Ltd’ни ўз ичига олган консорциум. Бўлажак келишув миқдори ҳали номаълум. Компания вакиллари агентлик хабарига изоҳ беришдан бош тортган.
Санкциялар бир вақтлар Хитойнинг энг йирик технология компанияси бўлган Huawei’га жиддий таъсир кўрсатишда давом этмоқда. Компания аллақачон Honor смартфон брендини алоҳида компанияга ажратиб, сотиши керак эди. Бундан ташқари, компания яқинда чораклик даромадининг кетма-кет тўртинчи марта пасайганини эълон қилди — бу сафар 38 фоизга.
Аввалроқ «Яндекс» капиталлашуви биринчи марта 30 млрд доллардан ошгани ҳақида хабар берилганди.