Россиянинг «Яндекс» компанияси капиталлашуви АҚШнинг NASDAQ фонд биржасида 3 ноябрь куни ўтказилган савдо якунларига кўра, илк бор 30 миллиард доллардан ошди. Бу ҳақда Bloomberg хабар бермоқда.

Маълум қилинишича, «Яндекс»нинг Нидерландияда рўйхатдан ўтган бош офисининг бозор қиймати 30,119 миллиард долларни ташкил этган. Охирги савдо сессияси натижаларига кўра, компания акциялари нархи ҳар бир акция учун 84 долларга етган. Кун давомида акциялар нархи 1,31 фоизга қимматлашган.

Шунингдек, «Яндекс» акциялари Москва биржасида хорижий эмитентнинг қимматли қоғозлари сифатида рўйхатга олинган. Москва биржасининг статистик маълумотларига кўра, 3 ноябрдаги савдолар натижасида уларнинг қиймати биринчи марта 6 минг рублдан ошди.

Маълумот учун, сентябрь ойи ўрталарида компания акциялари бу даражага яқинлашганди, бироқ кейинчалик улар 6 минг рубллик чегарадан ўта олмай, нархи тушиб кетди. «Яндекс»нинг умумий даромади 2021 йилнинг учинчи чорагида 2020 йилнинг шу даврига нисбатан 52 фоизга ошиб, 91,3 миллиард рублни ташкил қилди.

Аввалроқ Squid Game сериалига асосланган криптовалюта нархи нолга тушгани ҳақида хабар берилганди.