Венгриянинг Wizz Air авиакомпаниясининг самолёти 25 январь куни маҳаллий вақт билан соат 10:33 да Тошкентга келиб қўнди. Бу ҳақда Uzbekistan Airports матбуот хизмати хабар берди.

Маълум қилинишича, Airbus А321 neo самолёти Ўзбекистонга янги — Абу-Даби—Тошкент—Абу-Даби парвоз йўналишини очди. Экипаж ва йўловчилар терминалда тантанали равишда кутиб олинди.

Тўғридан-тўғри мунтазам рейслар А320/321 самолётларида ҳафтасига уч марта — душанба, чоршанба ва жума кунлари амалга оширилиши режалаштирилган. Ушбу йўналишдаги чипталар нархи бир томонга 45 доллардан бошланади.

Эслатиб ўтамиз, 2022 йил декабрь ойидан бошлаб Wizz Air Самарқанд аэропортига ҳафтасига икки марта — сешанба ва шанба кунлари парвозларни амалга ошириб келмоқда.

Маълумот учун, Wizz Air 2003 йил сентябрь ойида ташкил этилган. Асосий инвестор транспортга сармоя киритишга ихтисослашган Американинг Indigo Partners хусусий компанияси ҳисобланади. Биринчи парвоз Катовицедан 2004 йил 19 майда, Польша ва Венгрия Европа Иттифоқига ва Европа умумий авиация бозорига қўшилганидан 19 кун ўтиб амалга оширилган. Авиакомпания фаолиятининг дастлабки уч ярим ойида 250 минг йўловчини, фаолиятининг биринчи йилида эса 1,4 миллионга яқин йўловчини ташиди. 2012 йил охирига келиб компания 50 миллион йўловчини ташиди.

2019 йил охири ҳолатига кўра, авиакомпания 44 мамлакатдаги 151 аэропортда 710 та йўналишга парвозларни амалга оширди ва 2019 йил ноябрь ойида деярли 3 миллион йўловчини ташишга эришган.

Шунингдек, 2022 йил июль ҳолатига кўра, Wizz Air авиапарки ўртача ёши 5,3 йил бўлган 141 та Airbus самолётидан иборат эди.