«Амалий ишларни ҳозирдан бошлашимиз керак» — Президент электромобиль ишлаб чиқариш ҳақида
Шавкат Мирзиёев машинасозлик саноатида амалга оширилаётган ишлар юзасидан йиғилиш ўтказди.
Президент Шавкат Мирзиёев электромобиль ишлаб чиқариш бўйича амалий ишларни ҳозирдан бошлаш кераклигини таъкидлади. Бу ҳақда Президент ҳузуридаги машинасозлик саноатида амалга оширилаётган ишлар юзасидан ўтказилган йиғилишда маълум қилинди.
«Яна бир масала — жаҳонда электромобиллар ишлаб чиқариш жадал ривожланиб, автомобиль бозорида салмоқли ўрин эгалламоқда. Биз ҳам бу соҳада ортда қолмаслигимиз учун амалий ишларни ҳозирдан бошлашимиз керак», — деган Президент йиғилишда.
Қайд этилишича, мутасаддиларга уч ой муддатда электромобиль тармоғини ривожлантириш стратегиясини киритиш топширилган. Бунда қуйидагиларни вазифалар қўйилган:
- электромобиллар учун бутловчи қисм ва материалларни маҳаллийлаштириш дастурини ишлаб чиқиш;
- электромобиллар учун техник талаб ва замонавий стандартларни ишлаб чиқиш.
Шунингдек, йил якунига қадар хорижий компаниялар билан музокараларни якунлаб, стратегик ҳамкор билан лойиҳани бошлаш юзасидан кўрсатма берилган.
Аввалроқ Ўзбекистонда автомобиллар учун «растаможка» 2 бараварга пасайтирилиши хабар қилинганди. Шунингдек, «Ўзавтосаноат»нинг 3 та корхонаси сотувга чиқарилиши ҳақида хабар берилди.
