Apple март ойида бюджетли iPhone’нинг янги версиясини ва 5G’ни қўллаб-қувватлайдиган янгиланган iPad Air’ни тақдим этиши мумкин. Бу ҳақда Bloomberg хабар берди.

Маълум қилинишича, Apple март ойи бошида янги бюджетли iPhone ва 5G’ни қўллаб-қувватлайдиган янгиланган iPad’ни тақдим этишни режалаштирмоқда. Компания 8 март куни ёки шу санага яқин онлайн тақдимот ўтказиш ҳақида ўйлаяпти. Apple вакили компаниянинг режалари ҳақида изоҳ беришдан бош тортган.

Янги смартфон икки йил ичидаги бюджетли iPhone SE моделининг биринчи янгиланиши бўлади. Унга 5G тармоқларидан фойдаланиш имконияти, яхшиланган камера ва тезлаштирилган процессор қўшилади. Аммо дизайн 2020 йил апрель ойида тақдим этилган версияга ўхшаш бўлади. iPhone SE’нинг биринчи версияси 2016 йилда чиқарилган.

Янги планшет тезроқ процессор ва 5G’ни қўллаб-қувватлайдиган iPad Air’нинг янгиланиши бўлади. iPad Air’ни биринчи версияси 2013 йил октябрь ойида пайдо бўлган ва ўшандан бери бир неча марта, жумладан 2021 йилда янгиланган.

Таъкидланишича, Apple март ойининг биринчи ярмида ўз дизайнидаги чипларга эга янги компьютерни ҳамда қурилмаларга iPhone ва iPad фойдаланувчиларининг ниқобланган юзларини таниб олиш имконини берувчи iOS 15.4 дастурий таъминотининг янгиланган версиясини чиқаришни режалаштирмоқда. iOS 15.4 бир вақтнинг ўзида бир нечта iPad ва Mac компьютерларида битта трекпад ва битта клавиатурадан фойдаланиш имконини берувчи «универсал бошқарув» функциясини тақдим этади.

Июнь ойида компания ўзининг йиллик Бутунжаҳон дастурчилар конференциясини ўтказиши мумкин, у ерда iPhone, iPad, Mac ва Apple Watch учун дастурий таъминот янгиланишини эълон қилади. Шунингдек, кузда компания iPhone14 ва янги компьютерларнинг чиқарилишига бағишланган бир нечта тадбирларни ўтказиши мумкин.

Қайд этилишича, 2022 йилдаги янги моделлар iMac ва Mac Pro стол компьютерлари, янгиланган MacBook Air и MacBook Pro, Apple Watch’нинг учта версияси, тўртта iPhone 14 ва янги AirPods бўлиши мумкин.

Аввалроқ Apple 2022 молиявий йилнинг биринчи чорагида рекорд даромад кўргани хабар қилинганди. Шунингдек, Apple смартфонларга Face ID’дан ниқобли ҳолда фойдаланиш имкониятини қўшиши ҳақида хабар берилди.