Apple компанияси iOS ва iPadOS 15.4 бета-версияларига тиббий ниқоб таққан ҳолда смартфонни қулфдан чиқариш имконини берувчи функцияни қўшди. Бу ҳақда 9to5Mac ёзмоқда.

Apple веб-сайтида айтилишича, ниқобланган юзни таниб олиш учун қурилма фойдаланувчининг кўз атрофидаги ҳудудни сканерлайди ва ўзига хос хусусиятларни қайд этади.

Функцияни созламалар орқали ёқиш мумкин, лекин у фақат iPhone 12 ва ундан юқори версияларида мавжуд. Шунингдек, таниб олишни аниқроқ қилиш учун доимо кўзойнак тақишни ҳам белгилаш мумкин. Фаоллаштириш вақтида тизим яна сканерни созлаш жараёнидан ўтишни сўрайди.

Apple Face ID функцияси юзни тўлиқ танишга созланганда «аниқроқ» бўлиши ва қуёшдан сақлайдиган кўзойнак таққанда ишламаслиги ҳақида огоҳлантирган.

Apple бир йил олдин ниқобланган фойдаланувчи идентификацияси билан боғлиқ муаммони қисман ҳал қилган ва iOS 14.5 да Apple Watch ёрдамида смартфонни қулфдан чиқариш имконини берувчи хусусиятни қўшганди. Бироқ кўпчилик iPhone фойдаланувчилари компаниянинг ақлли соатларидан фойдаланмайди.

Аввалроқ Японияда ниқобли харидорларнинг юзини танийдиган тўлов тизими яратилгани хабар қилинганди. Шунингдек, Apple iPhone’га карта тўловларини қабул қилиш функциясини қўшиши ҳақида хабар берилди.