Apple автоҳалокат юз берганда автоматик фавқулодда қўнғироқ қилиш функциясини ишлаб чиқмоқда. Бу ҳақда The Wall Street Journal компаниянинг ички ҳужжатлари ва хабардор манбаларга таяниб хабар берди.

Нашрнинг ёзишича, янги функция Apple Watch ва iPhone’га 2022 йилдаёқ қўшилиши мумкин. Қурилмалар фойдаланувчининг аварияга учраганини уларга ўрнатилган ҳаракат датчиклари ёрдамида аниқлайди.

Ҳужжатларга кўра, Apple 2020 йил давомида фойдаланувчилар аноним равишда тақдим этган маълумотларни йиғиб, ушбу функцияни синовдан ўтказган. Шу вақт ичида компания алгоритмлари 10 миллиондан ортиқ эҳтимолий бахтсиз ҳодисаларни аниқлаган, улардан 50 мингга яқини фавқулодда хизматларга қўнғироқ қилган.

Шунингдек, iPhone эгалари соғлиғини ҳимоя қилиш учун яна бир функцияга эга бўлиши мумкин. Маълумотларга кўра, Apple смартфон ёрдамида депрессия ва когнитив бузилишларни ташхислашда ёрдам берадиган технологиялар устида ишламоқда.

Тадқиқотчилар фойдаланувчиларнинг юз ифодалари, нутқ тезлиги, юриш частотаси, уйқу режими ва бошқаларни таҳлил қилиш учун iPhone видеокамералари, клавиатуралари ва аудио датчикларидан маълумотлар йиғади.

Аввалроқ Microsoft Apple’ни ортда қолдириб, дунёдаги энг қиммат компанияга айлангани ҳақида хабар берилганди.