АҚШ Президенти Жо Байден маъмурияти вакиллари Қатар билан Европага суюлтирилган газ етказиб бериш бўйича музокаралар олиб бормоқда. Бу ҳақда Bloomberg ахборот манбаларига таяниб хабар берди.

Маълумотларга кўра, Байден Қатар амири Шайх Тамим бин Ҳамад Ол Сонийни АҚШга таклиф қилмоқчи. Учрашув январь ойида бўлиб ўтиши мумкин, унга тайёргарлик анча вақтдан бери давом этмоқда.

Украина атрофидаги вазият туфайли Россияга қарши санкциялар қиш ўрталарида Россия газини етказиб бериш тўхтатилиши ёки чекланишига олиб келиши мумкин. АҚШ расмийлари газ етказиб берилишининг тўхтатилишидан хавотирда бўлган Европа давлатларининг қўрқувини йўқотмоқчи. Таъкидланишича, Европа газнинг 40 фоиздан ортиғини Россиядан олади.

Қатар, ўз навбатида, суюлтирилган газ бўйича дунёдаги энг йирик ишлаб чиқарувчилардан бири бўлиб, ўз ёқилғисининг тўртдан уч қисмини Япония ва Корея каби кам энергия сарфлайдиган Осиё мамлакатларига сотади. Қатар мамлакатда ишлаб чиқарилган суюлтирилган газнинг тахминан 5 фоизини Европага етказиб беради.

Қайд этилишича, Россия ва Украина ўртасида можаро юзага келган тақдирда АҚШнинг газ экспорти бўйича музокаралари ҳақида хабар берилган. Унга кўра, АҚШ расмийлари Украина инқирози кучайган тақдирда Европа Иттифоқига кимлар янги газ экспортчилари бўлиши мумкинлиги ва уларнинг газ етказиб бериш ҳажмини ошириш имконияти бор-йўқлигини аниқлаш мақсадида бир қанча халқаро энергетика компаниялари билан музокаралар ўтказган. Корхоналар глобал газ экспортининг жуда чеклангани ва Россиянинг улкан ёқилғи экспортининг тўлиқ ўрнини босадиган газ жуда камлигини айтган.

АҚШ разведкаси Украина билан чегарага яқин жойда рус қўшинлари контингенти кўпайганини пайқаган ва Москва қўшни давлатга бостириб киришни режалаштираётган бўлишидан хавотирда. АҚШ, агар бу содир бўлса, Россияга қаттиқ санкциялар билан таҳдид қилган. Россия ҳукумати мамлакат Украинага ҳужум қилиш ниятида эмаслигини таъкидлаб, буни кескинликни кучайтириш учун тарқатилган хабарлар эканини айтган.

Аввалроқ Европада газ инқирози қачон ва қандай тугаши ҳақида таҳлил эълон қилинганди. Шунингдек, АҚШ «Шимолий оқим-2» газ қувурига нисбатан янги санкциялар киритгани ҳақида хабар берилди.