2021 йил декабрь ойи якунлари бўйича қайд этилган АҚШ истеъмол инфляцияси 40 йиллик рекордни янгилади. Бу ҳақда «Коммерсантъ» хабар берди.

Қайд этилишича, Америкада йиллик ҳисобда нархлар 7 фоизга ошган. Ноябрда эса 6,8 фоизга кўтарилганди. Бундай сезиларли ўсиш, биринчи навбатда, ноябрь ойидаги 4,9 фоиздан декабрь ойида 5,5 фоизгача кўтарилган асосий инфляция билан изоҳланган.

Маълумот ўрнида, АҚШда инфляциянинг сўнгги сезиларли ўсиши 2008-2009 йиллардаги жаҳон молиявий инқирозидан тикланиш даврида кузатилган, бироқ кейинчалик нархлар атиги 4 фоизга ошган ва ҳозирги вазиятдан фарқли ўлароқ, базавий инфляция мўътадил бўлган.

Декабрь ойига келиб Қўшма Штатларда нархларнинг ҳар ойда ўсиши 0,5 фоизни ташкил этди, энергия нархи эса 0,4 фоизга тушди. Шу жумладан бензин — 0,5 фоизга, газ — 1,2 фоизга пастлади. Аммо январь ойида улар яна кўтарилиши мумкин.

Таъкидланишича, декабрда озиқ-овқат маҳсулотлари нархи 0,5 фоизга ошган. Асосий инфляция ҳар ойда 0,6 фоизга кўтарилган. Жумладан, эски автомобиллар 3,5 фоизга, янгилари 1 фоизга қимматлашган. Кийим-кечак нархи 1,7 фоизга, авиачипталар 2,7 фоизга кўтатирлган.

Аввалроқ евро инфляцияси декабрь ойида рекорд даражада тезлашгани хабар қилинганди.