Тошкентдаги Hyatt Regency меҳмонхонасида 29 октябрь куни Central Asia Employer Brand Award — EMBRAS 2021 танловининг тақдирлаш маросими бўлиб ўтди. Бу ҳақда Artel компанияси матбуот хизмати хабар берди.

Маълум бўлишича, танловда иштирок этган Artel «Йилнинг энг яхши ютуқлари» номинациясида биринчи ўринга муносиб кўрилган. «Хайрли ишлар» номинациясида эса иккинчи ўринни эгаллаган. Бу орқали халқаро майдонда юқори нуфузга эга Central Asia Employer Brand Award Artel’нинг HR соҳасидаги ишларини юқори баҳолаган.

Қайд этилишича, танловда Artel’нинг HR соҳасида амалга оширган ишлари ва ижтимоий лойиҳалари нуфузли ҳакамлар ҳайъати томонидан эътироф этилган. EMBRAS Brand Award нафақат Ўзбекистон бозорида, балки Марказий Осиёда ҳам HR бўйича энг нуфузли мукофотлардан бири ҳисобланади. Танловда иштирок этиш компанияларга ўз лойиҳасини профессионал ҳакамлар ҳайъатига баҳолатиш, бенчмарк олиш ва бошқа компаниялар тажрибасини ўрганиш имкониятини беради.

Маълумот учун, бу йилги танловда Beeline Ўзбекистон мобиль оператори, Beeline Қозоғистон, Тошкент металлургия комбинати (ТМЗ), Infinbank, Freedom Finance инвестиция компанияси, Bek corp диверсификацияланган холдинги, ISHONCH дўконлар тармоғи каби 16 дан ортиқ йирик компания ва брендлар иштирок этди.

Аввалроқ Нукусда ёшлар учун стартап ғоялар танловига ариза қабул қилиш бошлангани ҳақида хабар берилганди.