АТКР вазирлиги ижтимоий тармоқлар чекланишига «техник носозлик» сабаб бўлганини маълум қилди
Аввалроқ «Ўзкомназорат» бошлиғи «нотўғри ва келишилмаган хатти-ҳаракатлари учун» ишдан олинганди
Ўзбекистонда 3 ноябрь куни Facebook, Instagram, «Одноклассники», LinkedIn, «Мой мир», ижтимоий тармоқлари, Telegram мессенжери ва YouTube видеоплатформаси фаолияти чеклаб қўйилди. Ахборот технологиялари ва коммуникацияларни ривожлантириш вазирлиги матбуот хизмати ҳолат юзасидан изоҳ берди. Орадан вақт ўтиб, расмий муносабат вазирлик сайтидан ўчириб ташланди.
Маълум қилинишича, «Ўзбектелеком» АК ускунасида қисқа муддатли техник носозлик юзага келиши муносабати билан кўрсатилаётган телекоммуникация хизматлари сифатининг ёмонлашиши ва узилишлар кузатилган. Ушбу тармоқлардаги узилишлар техник ускуналардаги носозликлар сабабли юзага келган. Ҳозирда барча техник ускуналар носозликлари бартараф этилган.
Хабарга кўра, Facebook, Instagram, «Одноклассники», LinkedIn, «Мой мир», ижтимоий тармоқлари, Telegram мессенжери ва YouTube видеоплатформаси одатдаги ҳолатда фаолиятини давом этирмоқда.
Кузатилган техник носозлик оқибатидаги ноқулайлик ҳолатлари бўйича Ахборот технологиялари ва коммуникацияларини ривожлантириш вазирлиги барча фойдаланувчилардан узр сўраган.
Аввалроқ «Ўзкомназорат» Telegram мессенжери ҳамда YouTube, Instagram, Facebook ва Odnoklassniki тармоқларининг Ўзбекистондаги фаолиятини чеклаб қўйилганди. Улардан айримлари Ўзбекистонда VPN’сиз ишламаётганди.
Шундан сўнг Ўзбекистон Президенти Шавкат Мирзиёев хабардор бўлганидан сўнг мамлакатда 3 ноябрь куни фаолияти чекланган ижтимоий тармоқлар қайта ишлай бошлади. Ўзбекистон Бош вазиринг қарорига асосан Ахборотлаштириш ва телекоммуникациялар соҳасида назорат бўйича давлат инспекцияси бошлиғи Ғолибшер Зияев нотўғри ва келишилмаган ҳатти-ҳаракатлари учун эгаллаб турган вазифасидан четлатилди.
