Германия автомобиль бренди Audi 24 февралдан бошлаб Россия дилерлик марказларига машина етказиб беришни тўхтатди. Бу ҳақда автомобиль ишлаб чиқарувчисининг россиялик ҳамкорларга йўллаган мактубида сўз боради. «Ведомости» ҳужжат билан танишган.

Қайд этилишича, аллақачон, Россия божхонасидан ўтишга улгурган ва импорт қилувчининг омборига жўнатиш режалаштирилган автомобиллар аввалдан тузилган ҳужжатларга мувофиқ дилерлик марказлари манзилига жўнатилади.

Audi харидорларни жўнатишни қайта тиклаш ва нархлаш шартлари ҳақида кейинроқ хабардор қилмоқчи.

Маълум қилинишича, худди шундай мактуб Американинг General Motors концернидан ҳам келган. Шунга ўхшаш мазмундаги хабарлар Volkswagen, Чехиянинг Skoda (Volkswagenga тегишли) компаниясидан ҳам кутилмоқда.

Яна бир манбанинг айтишича, Британиянинг Land Rover (Ҳиндистон Tata Motors’га тегишли) компанияси ҳам етказиб беришни якунлаган ва фақат 24 февралга қадар йўлга чиққан автомобилларгина Россия бозорига кириб келади. Германиянинг Porsche бренди билан ҳам вазият худди шундай.

Қайд этиш керакки, автомобиль ишлаб чиқарувчи йирик компанияларнинг бундай ҳаракатлари албатта, Шарқий Европада юз бераётган инқирозли ҳолат билан боғлиқ. Чунки Ғарб давлатларнинг Россияга қўяётган санкциялари, мамлакат бозоридаги хавотирларни ошириб юборади.

Жумладан, маҳаллий валюта — рубль қадрсизланмоқда, шунингдек у энг беқарор валютага ҳам айланиб улгурди. Бундан ташқари, жорий этилаётган чекловлар Россия бозорига автомобиль олиб киришни ҳам қийинлаштириб қўяди.

Аввалроқ Америка Қўшма Штатлари Россиянинг Украинадаги ҳарбий ҳаракатларига қарши чоралар кўриш мақсадида «Сбербанк», «Газпромбанк», «Открытия» Банклари, «Совкомбанк», «Новикомбанк»га қарши санкциялар киритаётгани ҳамда ушбу чекловлар мамлакат банк секторининг 80 фоизини қамраб олиши хабар қилинганди.

Бундан ташқари, Европа Иттифоқи Россиянинг Шарқий Европада олиб бораётган ҳарбий ҳаракатлари фонида санкцияларнинг иккинчи пакетини эълон қилди. Унга кўра, янги чекловлар Россия банк бозори ва муҳим давлат компанияларининг 70 фоизига таъсир қилади, нефтни қайта ишлаш заводларини модернизация қилишни ва самолёт қисмларини етказиб беришни тўхтатади.