Microsoft компанияси асосчиси Билл Гейтс томонидан қўллаб-қувватланадиган Breakthrough Energy Catalyst (BEC) давлат-хусусий жамғармаси АҚШ, Буюк Британия ва Европа Иттифоқининг тоза технологиялар соҳасидаги лойиҳаларига 15 миллиард долларгача сармоя киритишни режалаштирмоқда. Бу ҳақда Financial Times хабар берди.

BEC 2015 йилда Гейтс томонидан асос солинган кенгроқ Breakthrough Energy Group таркибига киради. Бугунги кунга қадар у бизнес ва хайрия ташкилотларидан 1,5 миллиард доллардан ортиқ маблағ йиғди. Бироқ, BEC бошқарувчи директори Жон Голдман Financial Times нашрига фонд йиғилган маблағдан 10 баробар кўп сармоя киритишни режалаштираётганини айтган.

Голдманнинг айтишича, фонд 15 миллиард доллар сармоя киритиш учун инновацион молиялаш тузилмалари ва ҳамкорликлардан фойдаланишни режалаштирмоқда. Breakthrough Energy ўз веб-сайтида BEC’yb «паст углеродли иқтисодиётни қўллаб-қувватлаш учун янги ечимларни қандай молиялаштириш, ишлаб чиқариш ва сотиб олиш мумкинлигини кўрсатадиган дастур» деб таърифлайди.

BEC аввалдан тўртта асосий саноатга эътибор қаратган: тўғридан-тўғри ҳавони тортиб олиш, «яшил» водород, энергия сақлаш технологияси ва барқарор авиация ёқилғиси. Нашр маълумотларига кўра, жамғарма молиявий жиҳатдан фойдали бўлмаган йирик лойиҳаларга сармоя киритишни, хайрияларни амалга оширишни, суб-бозор капиталига инвестицияларни амалга оширишни ва етказиб бериш шартномаларини тузишни режалаштирмоқда.

Сентябрь ойида BEC Microsoft, BlackRock, General Motors, American Airlines, Boston Consulting Group, Bank of America ва ArcelorMittal компанияларидан иинвестиция жалб қилганини эълон қилганди. Компания, шунингдек, АҚШ Энергетика вазирлиги ва Европа Иттифоқининг ижро этувчи органи, Европа Комиссияси томонидан ҳам ёрдам олди.

Аввалроқ Билл Гейтс 2022 йилда нимадан хавотирда экани ҳамда йилнинг асосий хавфи тўғрисида хабар берилганди.