Бизнес-омбудсман БМТ ва ЕТТБ билан коррупцияга қарши ҳамкорлик қилади
БМТ ва ЕТТБ вакиллари билан самарали бошқарув ва комплаенсни таъминлаш чора-тадбирлари муҳокама қилинди
Ўзбекистон Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакилликда БМТ ва ЕТТБ вакиллари иштирокида коррупцияга қарши кураш бўйича йиғилиш бўлиб ўтди. Бу ҳақда бизнес-омбудсман матбуот хизмати хабар берди.
Маълум қилинишича, бизнес-омбудсман ўринбосари Жамшид Урунов БМТнинг Наркотиклар ва жиноятчилик бўйича бошқармаси ҳамда Европа тикланиш ва тараққиёт банки вакиллари билан учрашган. Томонлар коррупцияга қарши курашишда хусусий секторнинг иштироки ва хабардорлигини ошириш бўйича ҳамкорликни муҳокама қилган.
Қайд этилишича, йиғилиш доирасида тадбиркорлик субъектларининг ички яхлитлик сиёсатини амалга ошириш бўйича содиқлигини ошириш борасида сўз борган. Шунингдек, самарали бошқарув ва комплаенсни таъминлашга қаратилган чора-тадбирларга оид масалалар муҳокама қилинган.
Томонлар, шунингдек, Бизнес-омбудсманни хабардор қилиш механизмларини такомиллаштириш ва унинг коррупцияга оид ҳуқуқбузарликлар ҳақида хабар берган ахборот берувчилар билан ўзаро ҳамкорлигини кучайтириш масалаларини муҳокама қилган.
Аввалроқ Ўзбекистонда 2021 йил бизнес-омбудсманга мурожаатлар 2 баравар ортгани хабар қилинганди. Шунингдек, Коррупцияга қарши курашиш агентлиги АҚШ идоралари билан ҳамкорлик ўрнатиши мумкинлиги ҳақида хабар берилди.
