Вазирлар Маҳкамасининг 2022 йил 10 февралдаги 70-сонли «Бухоро вилоятида қурилиш материаллари саноатини жадал ривожлантиришга доир қўшимча чора-тадбирлар тўғрисида»ги қарори қабул қилинди. Бу ҳақла Norma хабар берди.

Қайд этилишича, Бухоро вилоятида қурилиш материаллари саноатини жадал ривожлантириш, маҳаллий фойдали қазилмаларни қайта ишлашга инвестицияларни жалб этиш, кластер усулида рақобатбардош маҳсулотлар ишлаб чиқариш ва экспорт қилиш бўйича қуйидаги вазифалар белгиланган:

• цемент, доломит, гипс ва бошқа хомашё қазиб олишни ошириш;
• мармар ва гранит конларини ўзлаштириш, замонавий декоратив қоплама тошларини ишлаб чиқариш;
• графит конини ўрганиш, уни саноатда қазиб олиш ва чуқур қайта ишлаш, графит электродлари, тез зарядланувчи аккумуляторлар учун графит таёқчалар ва замонавий электротехника саноати учун эҳтиёт қисмлар ишлаб чиқаришни ташкил этиш.

Бундан ташқари, охра қазиб олишни ташкил этиш, ундан тайёр маҳсулотлар, бўёқлар, минерал пломба моддалари ва бошқаларни ишлаб чиқариш ҳам кўзда тутилган.

Шунингдек, қум-шағал конларини ўзлаштириш, саралаш ва майдалаш иншоотларини қуриш ва инерт материаллардан (қум, шағал) тайёр темир-бетон буюмлари, асфальт ва йўл қурилиш материаллари ишлаб чиқаришни ташкил этиш ҳам белгиланган.

Тасдиқланган рўйхатлар:

• кимошди савдосига қўйилган фойдали қазилмалар, шу жумладан, Бухоро вилоятининг ер қаъри участкалари;
• Бухоро вилоятида геологик ўрганиш учун таклиф қилинган истиқболли ер қаъри участкалари;
• 2022-2023 йилларда Бухоро вилоятида қурилиш материаллари ишлаб чиқариш бўйича амалга ошириладиган инвестисия лойиҳалари;
• Бухоро вилоятида қурилиш материаллари соҳасида истиқболли инвестиция лойиҳалари.

Ҳужжат маълумотлар миллий базасида давлат тилида эълон қилинган ва 2022 йил 11 февралдан кучга кирган.