Бутун Украина узра фуқаролик самолётларининг парвозлари тўхтатилди, Россиянинг жанубий вилоятларидаги аэропортлар ҳам самолётларни қабул қилиш ва жўнатишни тўхтатди. Бу ҳақда РБК ёзмоқда.

Украина Аэронавигация хизматлари провайдери — «Украэрорух» 24 февраль куни эрта тонгда Украина узра ҳаво ҳудуди ёпилганлиги ҳақида хабар берди. Бу Россия ҳаво ҳаракатини бошқариш давлат корпорацияси тузилмасининг шошилинч хабари асосида амалга оширилган.

Шунингдек, Украина пойтахти Киев шаҳрида жойлашган Борисполь аэропортининг иши тўхтатилган.

«Аэропорт ишламаяпти, аэропортнинг барча йўловчилари эвакуация қилинган, учиш-қўниш йўлаги тўсиб қўйилган», дейилади Украина Инфратузилма вазирлиги баёнотида.

Бундан ташқари, Украинадаги вазиятнинг кескинлашуви муносабати билан 2022 йил 24 февраль Россия жанубидаги бир қатор аэропортларда парвозлар вақтинча чекланган.

Федерал ҳаво транспорти агентлиги матбуот хизматига кўра, Ростов, Краснодар, Анапа, Геленжик, Элиста, Ставрополь, Белгород, Брянск, Орёл, Курск, Воронеж, Сочи ва Симферополь аэропортлари иши вақтинча тўхтатилган. Чеклов 2 мартгача амал қилади.

Аввалроқ Россияга учган самолёт Наманган аэропортига мажбурий қайтаётгани хабар қилинганди.