Чип тақчиллиги туфайли Toyota’нинг чораклик даромади 407 миллион долларга камайди. Бу ҳақда «Интерфакс» хабар берди.

Қайд этилишича, Япония автомобиль ишлаб чиқарувчиси Toyota Motor Corp. 2022-молиявий йилнинг учинчи чорагида пандемия келтириб чиқарган таркибий қисмлар танқислиги туфайли даромаднинг пасайиши фонида соф даромадни 5,6 фоизга қисқартирганини маълум қилган.

Ҳисобот чорагида компаниянинг соф фойдаси 2021 йилнинг шу давридаги 838,696 миллиард иенага нисбатан 791,74 миллиард иенани (6,85 миллиард доллар) ташкил этиб, 47 миллиард иена (407 миллион доллар)га камайган. FactSet томонидан сўралган таҳлилчилар соф даромадни ўртача 623,15 миллиард иена бўлишини кутган.

Яримўтказгичлар тақчиллиги фонида Toyota даромади 4,5 фоизга камайиб, 7,786 триллион иенани ташкил қилган. Бу, ўз навбатида, ишлаб чиқариш суръатларига салбий таъсир кўрсатган.

Компаниянинг операцион фойдаси Японияда 26 фоизга камайиб, 396,5 миллиард иенага етган. Шимолий Америкада эса 39 фоизга камайиб, 129,2 миллиард иенани ташкил қилган.

Toyota март ойида якунланган тўлиқ молиявий йил учун ўз даромадлари бўйича кўрсаткични пасайтирган. Компания даромаднинг 8,4 фоизга ўсиб, 29,500 триллион иенани ташкил этишини кутмоқда. 2021 йили 10 фоиз ўсиш прогноз қилинганди.

Шу билан бирга, компания соф фойда прогнозини тасдиқлаган. Унга кўра, соф фойда 11 фоизга ўсиб, 2,490 триллион иенани ташкил этиши кутилмоқда. Автомобиль савдоси прогнози 10,3 миллион даражасида қолдирилган.

Таъкидланишича, 2021 йил бошидан бери Toyota’нинг бозор капиталлашуви 10,1 фоизга ўсиб, 31,5 триллион иенани ташкил қилган.

Аввалроқ Toyota Япониядаги деярли барча заводларида ишлаб чиқаришни тўхтатгани хабар қилинганди. Шунингдек, Toyota Tacoma пикапининг янги версиясини тақдим этгани ҳақида хабар берилди.