Cobalt Қозоғистонда энг кўп сотилаётган автомобиль бўлиб турибди
Октябрь ойида Қозоғистон бозорида жами 2567 дона Chevrolet русумли автомобиль сотилган
Chevrolet Қозоғистонда биринчи рақамли бренд экани маълум бўлди. Бу ҳақда UzAuto Motors матбуот хизмати хабар берди.
Маълум қилинишича, Chevrolet Cobalt автомобиль модели кетма-кет бир неча ой давомида энг кўп сотилган моделлар рейтингида етакчи ўринни эгаллаб турибди.
Қозоғистон автомобиль бизнеси ассоциацияси (АКАБ)нинг маълумотларига кўра, 2021 йилнинг октябрь ойида Қозоғистон автомобиль бозорида жами 2567 дона Chevrolet русумли автомобиллар сотилган. Бу ўз навбатида, мамлакат янги автомобиллар бозори умумий ҳажмининг 28 фоизини ташкил этган.
Қайд этилишича, 2021 йил давомида UzAuto Motors томонидан ишлаб чиқарилган автомобиллар сотув бўйича брендлар орасида етакчиликни сақлаб келмоқда.
Аввалроқ Ўзбекистонда автомобиль сотиб олганлик учун йиғим тўлиқ бекор қилиниши ҳақида хабар берилганди. Шунингдек, Ўзбекистон энг кўп автомобиль экспорт қилаётган давлатлар рейтинги хабар қилинди.
