Ўзбекистон Молия вазирлиги ва Давлат солиқ қўмитасининг ахборот хати ҳамда солиқ тўловчилар томонидан келиб тушган сўров ва таклифлар асосида юридик шахсларнинг мол-мулк ва ер солиқлари ҳисобот шаклларига тегишли ўзгартиришлар киритилди.

Қайд этилишича, юридик шахсларнинг ер солиғи бўйича бир объект доирасида жойлашиб, ер майдон тоифаси турлича бўлган, шунингдек, пасайтирувчи коэффициент қўлланилиши лозим бўлган ер майдонларини алоҳида киритиш имконияти яратилган.

Маълумот учун, юридик шахслардан олинадиган ер солиғи ҳисоботини 10510_12 сонли (ойлик) ва 10510_13 сонли (чорак) пакет рақамли шаклларда тақдим этишлари мумкин (ер солиғи ҳисобот шаклини тўлдириш бўйича қўлланма).

Шунингдек, юридик шахсларнинг мол-мулк солиғи бўйича маълумотнома шаклида энг кам қиймат татбиқ қилинмайдиган кўчмас мулк объектларининг майдони, энг кам қийматнинг камайтирувчи коэффициенти алоҳида акс этирилиши имконияти яратилган.

Эндиликда тадбиркорлик субъектлари:

• сув ҳайдаш миноралари;
• резервуарлар;
• соябонлар;
• бетон майдончалар ва деворлар (бордюрлар); 
• бошқа шунга ўхшаш объектларни маълумотнома шаклининг 2-иловасида мустақил киритишлари мумкин (мол-мулк солиғи маълумотнома шаклини тўлдириш бўйича қўлланма). 

Эслатиб ўтамиз, юридик шахсларнинг мол-мулк солиғига аниқлаштирилган маълумотномани 1 апрелга қадар тақдим этган корхоналарга нисбатан пеня ҳисоблаш кўринишидаги жавобгарлик чораси қўлланилмайди.

Маълумот учун, юридик шахслардан олинадиган мол-мулк солиғи ҳисоботини 10401_23 сонли (ойлик) ва 10401_23 сонли (чорак) пакет рақамли шаклларда тақдим этишлари мумкин.

Юридик шахсларнинг мол-мулк ва ер солиқлари бўйича имтиёзга эга корхоналар эгалигидаги имтиёзга эга бўлган кўчмас мулк объектларини ҳисоботда акс эттириш учун шахсий кабинетидан «Солиқ имтиёзларидан фойдаланиш бўйича мурожаат» интерактив хизмати орқали мурожаат қилиши лозим.