Иқтисодий тараққиёт ва камбағалликни қисқартириш вазирлиги 2022 йил 24-30 январь кунларидаги Ўзбекистон иқтисодиёти фаоллигининг айрим кўрсаткичлари ҳақида маълумот берди.

Маълум қилинишича, иқтисодий фаоллик 2022 йил 24-30 январда жорий йилнинг 1-ҳафтасига нисбатан жонлангани кузатилган. Хусусан, божхона статистикаси маълумотларига кўра, 2022 йилнинг 24–30 январь кунлари товарлар экспорти ҳажми 155,5 миллион долларни ҳамда товарлар импорти ҳажми эса 613,3 миллион долларни ташкил қилган.

Энг кўп экспорт қилинган маҳсулотлар

Кузатилаётган ушбу даврда товарлар экспорти ҳажмининг 72,2 фоизи асосий 5 та товарлар гуруҳига тўғри келиб, жами 112,2 миллион долларни ташкил қилмоқда. Хусусан, 38,3 миллион долларлик калава ип, 29,6 миллион долларлик тўқимачилик маҳсулотлари, 23,8 миллион долларлик металл ва металл буюмлар, 11,6 миллион долларлик мева-сабзавот маҳсулотлари ва 8,9 миллион доллар миқдордаги озиқ-овқат маҳсулотлари экспорт қилинган.

Энг кўп импорт қилинган маҳсулотлар

Импорт товарлари гуруҳида эса энг катта улушга эга бўлган 5 та товарлар ҳажми 397,4 миллион долларни ташкил этган. Булар транспорт ва унинг эҳтиёт қисмлари (99,8 миллион доллар), кимё саноати маҳсулотлари (96,3 миллион доллар), технологик асбоб ва ускуналар (78,8 миллион доллар), электротехника ва унинг қисмлари (69,6 миллион доллар) ҳамда металл ва металл буюмлар (52,8 миллион доллар)дан иборат.

Шунингдек, ушбу даврда республика товар-хомашё биржасида ҳам юқори ликвидли маҳсулотларнинг сотилиш ҳажми 2021 йилнинг мос ҳафтасига нисбатан 1,1 бараварга ўсиши кузатилган. Жумладан, 2021 йилнинг мос ҳафтасига нисбатан суюлтирилган газ 2,0 бараварга, полиэтилен 1,5 бараварга, қора металлар прокати 1,2 бараварга, автомобиль бензини 1,2 бараварга ошгани қайд этилган.

Инфляция кўрсаткичлари

Бундан ташқари, 2022 йилнинг 17–23 январь кунлари, истеъмол нархлари индекси (ИНИ) бўйича инфляция даражаси 0,09 фоизни ташкил этган (65 та маҳсулот ва хизматлар кесимида). Ноозиқ-овқат маҳсулотлари нархлари ҳафта давомида ўртача -0,03 фоиз миқдорида, озиқ-овқат маҳсулотлари эса 0,22 фоиз миқдорида қайд этилган.

Ҳудудлар кесимида сезиларли ҳафталик ўсиш суръати Самарқанд (0,20 фоиз) ва Андижон (0,13 фоиз) вилоятларида ва Тошкент шаҳрида (0,16 фоиз) қайд этилган.

Аввалроқ Президент иқтисодий комплекс раҳбарларига бир қанча вазифалар топширгани хабар қилинганди. Шунингдек, Ўзбекистоннинг 2021 йилги иқтисодий кўрсаткичлари маълум бўлди.