Erasmus+ Ўзбекистон билан ҳамкорлик лойиҳаларига 11,5 млрд доллар маблағ ажратди
ЕИ мамлакатлари билан ҳамкорликда ўзбекистонлик ўқитувчилар малакасини ошириш учун семинарлар ташкиллаштирилади
Erasmus+ 2021–2027 йилларда Ўзбекистон билан ҳамкорлик лойиҳалари харажатларини 11,5 миллиард долларга оширди. Бу ҳақда Миллий ахборот агентлиги хабар берди.
Маълум қилинишича, Тошкент давлат иқтисодиёт университетида Erasmus+ лойиҳалари танловига бағишланган ахборот куни ташкил этилган. Унда Erasmus+ дастури лойиҳалари вакиллари, Таълим сифатини назорат қилиш давлат инспекцияси, Олий ва ўрта махсус таълим, Ташқи ишлар, Инвестиция ва ташқи савдо вазирликлари мутасаддилари иштирок этган.
Хабарга кўра, тадбирда Европа иттифоқига аъзо мамлакатлар, хусусан, Финляндиянинг нуфузли таълим муассасалари ва идоралари билан ҳамкорликда ўзбекистонлик ўқитувчилар малакасини оширишга қаратилган семинарлар, тренинглар ва қўшма тадбирлар ташкил этилишини таъминлаш масалалари муҳокама қилинган.
Шунингдек, нуфузли Европа экспертлари ва профессорларни жалб этган ҳолда миллий ўқув дастурларини такомиллаштириш ва экспертизадан ўтказишни қўллаб-қувватлаш ва маҳаллий экспертларнинг нуфузли ЕИ таълим ташкилотларида тажриба ва малака оширишини қўллаб-қувватлаш ҳақида фикр алмашилган.
Қайд этилишича, Европа Иттифоқининг энг муваффақиятли ва узоқ муддатли дастури сифатида эътироф этилган Erasmus+ дастури таълим, ўқитиш, спорт ва ёшларни қўллаб-қувватлаш соҳаларида лойиҳалар, ҳамкорлик алоқалари, турли йўналишда ўтказиладиган тадбирлар ҳамда мобилликни қўллаб-қувватлашга қаратилган.
Маълумот учун, 2021 йилнинг март ойида дастурнинг 2021–2027 йиллар учун мўлжалланган янги босқичи фаолият бошлади. Мазкур босқичнинг умумий бюджети 26,2 миллиард еврони ташкил этиб, бу 2014–2020 йиллар учун ажратилган маблағга нисбатан 11,5 миллиардга кўпдир.
Аввалроқ Ўзбекистонда таълим ва тиббиёт тизимига 58 триллион сўм ажратилиши хабар қилинганди.