Европа Иттифоқининг (ЕИ) янги санкциялар пакети Россия банк бозори ва муҳим давлат компанияларининг 70 фоизига таъсир қилади, нефтни қайта ишлаш заводларини модернизация қилишни ва самолёт қисмларини етказиб беришни тўхтатади. Бу ҳақда Еврокомиссия раиси Урсула фон дер Ляйен хабар берди.

«Биринчидан, ушбу пакет Россиянинг энг муҳим капитал бозорларига киришини тўхтатадиган молиявий санкцияларни ўз ичига олади. Россия банк бозорининг 70 фоизини, шунингдек, асосий давлат компаниялари, жумладан, мудофаа соҳасида фаолият юритувчи компанияларни нишонга олганмиз», — дейди Урсула фон дер Ляйен ЕИ етакчиларининг учрашуви якунида.

Унинг сўзларига кўра, ушбу санкциялар, режага кўра, инфляцияни тезлаштиради ва Россия Федерациясининг саноат базасига аста-секин зарба беради.

«Санкцияларнинг иккинчи қисми энергетика секторига таъсир қилади — Россия Федерациясига алоҳида фойда келтирадиган асосий иқтисодий соҳа. Бизнинг бир қатор товарларни экспорт қилишни тақиқлашимиз нефтга таъсир қилади, бу эса Россияни нефтни қайта ишлаш заводларини модернизация қилишни имконсиз қилади», — дейди у.

Европа Иттифоқи санкциялари, шунингдек, Россия авиакомпанияларига самолёт қисмлари ва жиҳозларини сотишни тақиқлашни ҳам ўз ичига олади.

Еврокомиссия раҳбари бу қадам муҳим аҳамиятга эга эканлигини таъкидлади, чунки Россия Федерациясида ишлатиладиган кўплаб йўловчи самолётлари АҚШ ва Европада ишлаб чиқарилган.

Фон дер Ляйеннинг сўзларига кўра, виза чекловлари дипломатлар ва улар билан боғлиқ бўлган гуруҳларга, шунингдек ишбилармонларга таъсир қилади: улар энди Европа Иттифоқига имтиёзли кириш ҳуқуқига эга бўлмайди.

24 февраль куни эрта тонгда Россия Президенти Владимир Путин Украинада ҳарбий операция бошланганини маълум қилди. Бунга жавобан АҚШ, Буюк Британия, Канада ва Япония, аллақачон, Россияга қарши санкциялар киритган.