«Фарғонаазот»нинг 99 фоиз акция пакетининг хусусийлаштириш жараёни бошланди
Корхонанинг жами ишлаб чиқариш қуввати йилига 2,8 млн тонна ўғитни ташкил қилади.
«Фарғонаазот» корхонаси устав капиталидаги 99,02 фоиз акция пакетларини музокаралар учун оммавий таклиф сотув жараёни орқали сотиш бошланди. Бу ҳақда Давлат активларини бошқариш агентлиги матбуот хизмати хабар берди.
Ўзбекистон Президентининг 2021 йил 13 февралдаги «Кимё саноати корхоналарини янада ислоҳ қилиш ва молиявий соғломлаштириш, юқори қўшилган қийматли кимёвий маҳсулотлар ишлаб чиқаришни ривожлантириш чора-тадбирлари тўғрисида»ги фармонига мувофиқ, Давлат активларини бошқариш агентлиги «Фарғонаазот» устав капиталидаги 99,02 фоиз акция пакетларини музокаралар учун оммавий таклиф сотув жараёни орқали сотиш режасини эълон қилди.
Deloitte TCF LLP ушбу Битим бўйича Давактив агентлигининг етакчи маслаҳатчиси ҳисобланади. Халқаро Молия Корпорацияси ҳам активни хусусийлаштиришга ёрдам беради.
Хабарга кўра, сотиш жараёни барча манфаатдор томонлар учун очиқ бўлган рақобат муҳити асосида ташкил этилган. Жараён манфаатдор иштирокчилардан мажбурий бўлмаган (non-binding offers), сўнгра мажбурий бўлган (binding offers) таклифларни олишдан ва бир ёки бир нечта манфаатдор номзодлар билан кейинги музокараларни ўтказишдан иборат бўлади.
«Фарғонаазот» акциядорлик жамияти 1962 йилда ташкил этилган. Корхона Ўзбекистонда минерал азотли ўғитлар, дефолиантлар ва целлюлоза ацетатлар ишлаб чиқарувчи йирик корхоналардан бири ҳисобланади.
Қайд этилишича, корхона 3 та асосий комплексга бўлинган. Булардан биринчиси минерал ўғитларни ишлаб чиқариш мажмуаси бўлиб, унда АМ-76 кенг кўламли аммиак агрегати, концентрацияланмаган АК-72М азот кислота ва АS-72М аммиакли селитра ва карбамид ишлаб чиқарилади.
Шунингдек, натрий хлор ва магний хлорат дефолиантини ишлаб чиқариш мажмуаси ҳамда ацетат толаси ва целлюлозанинг мураккаб эфирларини ишлаб чиқариш мажмуалари корхона таркибидан ҳисобланади.
Бундан ташқари, азот-фосфор ўғитлари AFO, КАS суюқ ўғити, суюлтирилган азот-кальцийли ўғит, Darmon иссиқхона хўжаликлари учун ўғитлар, натрий нитрати, натрий бикарбонати, полиэтилен пакетлар, минерал ўғитларни контейнерлар билан таъминлаш учун полиэтилен қоплар ва бошқа цехлар мавжуд. Корхонанинг жами ишлаб чиқариш қуввати йилига 2,8 миллион тонна ўғитни ташкил қилади.
Аввалроқ «Фарғонаазот»нинг устав капиталидаги акция пакетлари хусусийлаштирилиши хабар қилинганди.
