Финляндияда ҳайдовчи Tesla’ни таъмирлатмаслик учун портлатиб юборди
Катайнен турли объектларни портлатиш билан шуғулланувчи блогер Pommijätkät’га мурожаат қилган.
Финляндиялик Туомас Катайнен 22,6 минг долларга Tesla Model S автомобилини таъмирлатмаслик учун уни портлатиб юборди. Бу ҳақда Gizmodo нашри хабар берди.
Қайд этилишича, Туомас Катайнен 2013 йилда ишлаб чиқарилган Tesla’ни таъмирлаш учун устахонага борган. У ерда электромобилни тузатишнинг ягона йўли аккумуляторни алмаштириш эканлиги маълум бўлган.
Аккумуляторни алмаштириш эса тахминан 22,6 минг долларга тушиши ҳисоб қилинган. Tesla Model S русумидаги эски электромобилнинг нархи эса 30 минг доллар туради. Шундан сўнг электромобиль эгаси уни портлатиб юборишга қарор қилган ва шу иш билан шуғулланувчи блогерга мурожаат қилган.
Ўз навбатида, блогер Pommijätkät Tesla’га 30 килограмм портловчи моддани боғлаб, бўш карьерда уни портлатиб юборган. Бундан ташқари, ҳайдовчи ўриндиғига Илон Маск кўринишидаги қўғирчоқ ҳам ўрнатилган эди. Катайнен эса портлашни томоша қилиб завқ олганини таъкидлаган.
Маълумот учун, Tesla аккумуляторлари саккиз йиллик кафолатга эга, шундан сўнг машина эгаси батареяни алмаштириш учун тўловни тўлиқ ўзи амалга ошириши керак.
Аввалроқ Tesla янги седанларини эски аккумулятор билан сотувга чиқаргани хабар қилинганди.
