«Маҳалла» хайрия жамоат фонди 2021 йилда фуқаролар йиғинларини компьютер ва мебель жиҳозлари билан таъминлашга 6,5 миллиард сўмдан зиёд маблағ йўналтирган. Бу ҳақда АОКАда ўтказилган брифингда «Маҳалла» хайрия жамоат фонди ахборот хизмати раҳбари Ҳасан Саломов ўтган йил давомида амалга оширилган ишлар юзасидан маълумот берди.

Қайд этилишича, 4 мингдан ортиқ маҳалла идораларининг коммунал тўловлардан бўлган 2 миллиард сўмдан зиёд қарздорлиги қоплаб берилган.

Шунингдек, ижтимоий ҳимояга муҳтож оилаларни манзилли қўллаб-қувватлашга 1,5 миллиард сўмдан зиёд маблағ сарф этилган. Яна шунча маблағ боқувчисини йўқотган, вояга етмаган етимлар, якка-ёлғиз қариялар, ногиронлар ҳамда табиий офатлардан азият чекканларга молиявий ёрдам кўрсатишга йўналтирилган.

Жумладан, 58 нафар фуқарога ногиронлик аравачалари, 49 нафар фуқарога эса эшитиш ва ортопедик мосламалар олиб берилган. 5 мингдан зиёд аҳолига кийим-кечак, 4 мингга яқинига эса озиқ-овқат маҳсулотлари тарқатилган. Шунингдек, 3 минг нафар фуқарога нақд пул кўринишидаги моддий ёрдамлар кўрсатилган.

«Фондимиз кам таъминланган оилаларни иссиқ кийим-кечаклар билан таъминлаш масаласига ҳам алоҳида ёндашиб келмоқда. Ўтган бир йилда ‘Мурувват’ ва ‘Саховат’ уйларида яшовчи ватандошларимиз ҳамда эҳтиёжманд аҳоли қатламига салкам 1 миллиард сўмлик кийим-кечак маҳсулотлари олиб берилди», дейилади хабарда.