General Motors Россия бозорини тарк этади
GM концернига Chevrolet, Cadillac, Opel ва бошқалар киради.
Американинг General Motors автомобилсозлик компанияси ниҳоят Россияни тарк этади, деб ёзади «Коммерсантъ» автомобиль бозоридаги учта манбага таяниб.
Уларнинг сўзларига кўра, GM аллақачон Россия ваколатхонаси ходимларини ишдан бўшатиб, дилерларга автомобиллар ва эҳтиёт қисмлар етказиб беришни тўхтатиш ҳақида билдиришномалар юбормоқда.
Россия 11 март куни АҚШдан «ҳашаматли автомобиллар» келтирилишини тақиқлади. 2015 йилда Қримнинг аннекция қилиниши фонида ишлаб чиқариш ёпилганидан сўнг GM АҚШдан фақат қиммат Chevrolet ва Cadillac моделларини етказиб берди. Дастлабки уч ой давомида Россияда 266 та Chevrolet ва 162 та Cadillac автомобиллари сотилган.
Нашр манбасига кўра, сўнгги ҳафталарда General Motors Америка регуляторидан тушунтиришларни кутмоқда. Компания «Коммерсантъ» сўровига жавоб бермаган.
Компаниядан билдиришнома олган дилерлар орасидаги манбаларга кўра, уларга дилерлик марказларига киритган сармоялари учун компенсация берилмайди, гарчи яқинда салонлар «импорт қилувчининг янги талабларига жавоб берадиган тарзда қайта таъмирланган» бўлса-да.
Шу билан бирга, нашр суҳбатдошининг қайд этишича, 2015 йилда ишлаб чиқариш қисқариши вақтида GM дилерларга харажатларни қисман қоплаган.
Автомобиль ишлаб чиқарувчиси манбасининг таъкидлашича, умуман олганда, дилерлик дўконларига киритилган инвестициялар узоқ вақт давомида ўзини оқлаган, аммо агар интерьер яқинда таъмирланган бўлса, «бу ҳақиқатан ҳам жиддий».
Сабаблар
«Автостат» ижрочи директори Сергей Удаловнинг айтишича, компания 2015 йилда девальвацияни автомобиллар нархига ўтказгач, General Motors учун Россия жуда кичик бозорга айланган, сотувлар пасайгач, Россияда ишлаб чиқариш қисқарган.
Аммо у Chevroletнинг оммавий моделлари Ўзбекистонда GM лицензияси асосида ишлаб чиқарилганини эслади. Eurasianet UzAuto 9 мартдан бошлаб Chevrolet русумидаги русумли автомобилларни Россияга экспорт қилишни тўхтатганини ёзди.
Россиянинг Украинага босқини бошланганидан кейин, март ойи бошида General Motors Россияга автомобиль етказиб беришдан бош тортди. Компания «бир қатор ташқи омилларни, жумладан, таъминот занжири муаммолари ва компаниянинг назорати остида бўлмаган бошқа муаммоларни» келтириб ўтди.
GM концернига Chevrolet, Cadillac, Opel ва бошқалар киради.