Google юз бериши мумкин бўлган иқтисодий рецессия (иқтисодий ўсишнинг секинлашиши, пасайиши) сабаб 2022 йил охиригача янги ходимларни ишга ёллашни камайтирмоқчи. Бу ҳақда Google ва Alphabet бош директори Сундар Пичаи Bloomberg нашрига хабар берди.

«Пичаи компания 2022 ва 2023 йилларда ‘муҳандислик, техник ва бошқа муҳим бўлимларни’ тўлдиришга эътибор қаратишини айтиб ўтди», дея қўшимча қилган Bloomberg.

Google раҳбари ходимларни компаниянинг «қуёшли кунлари»дагига қараганда тезроқ ва кўпроқ ишлашга чақирган.

«Google тарихан иқтисодий таназзулга нисбатан иммунитетга эга», деб ёзади Bloomberg. 

Интернет гиганти 2008 йилги инқироз пайтида янги ходимларни ёллашни тўхтатганди.

Аммо инқироз тугаганидан сўнг компания ўзининг асосий реклама бизнеси, шунингдек, смартфонлар ва ўзиюрар автомобиллар ишлаб чиқариш бўлимларига янги ходимлар қабул қилишни доимий равишда кўпайтириб борди.

31 март ҳолатига кўра, 160 мингга яқин одам ишлаётган Alphabet комапанияси сўнгги йилларда асосан cloud computing бўлими ва янги жамоалари учун ходимлар ёллаётган эди.

Google’дан олдин АҚШнинг бошқа технология компаниялари ҳам кадрлар сиёсатини қайта кўриб чиқишга қарор қилганди.

Май ойида Snap ва Lyft ишга қабул қилишни секинлаштиришини маълум қилган бўлса, Tesla ишчилари сонини ўн фоизга қисқартиришини эълон қилди. Microsoft ҳам иш ўринларини қисқартирмоқчи.

Рецессия хавфи

Иқтисодчилар АҚШда кейинги ўн икки ой ичида рецессия эҳтимолини қирқ тўрт фоизга баҳоламоқда. 

«Одатда, бундай кўрсаткич фақатгина ҳақиқий рецессия олдидан ёки у юз берган вақтда кузатилади», дея таъкидлаган The Wall Street Journal.

Рецессия хавфи АҚШ Федерал захира тизими июнь ойида доллар курсни 1990 йиллар ўрталаридан бери рекорд даражага кўтаргани сабаб ортиб бормоқда. Халқаро валюта жамғармаси АҚШ иқтисодиёти пандемия туфайли юзага келган зарбани тезда енгиб ўтганини қайд этган эди.

Бироқ захираларнинг тугаши билан боғлиқ бўлган талабнинг тез тикланиши, шунингдек, энергия нархларининг кўтарилиши ва етказиб бериш занжиридаги узилишлар инфляциянинг сезиларли даражада ошишига олиб келди.

Халқаро валюта жамғармасининг таъкидлашича, ҳозирги шароитда рецессия хавфи билан курашиш янада қийинлашган.

Аввалроқ Илон Маск АҚШни рецессия хавфидан огоҳлантирганди.