АҚШда яқин келажакда  рецессия юз бериши мумкин. Бу ҳақда дунёнинг энг бой одами Илон Маск Қатар иқтисодий форумида айтиб ўтди.

Унинг айтишича, қайсидир паллада рецессия юз бериши муқаррар.

«Рецессия яқин келажакда содир бўладими, деган саволга жавоб «йўқ»дан кўра кўпроқ «ҳа»дир. Бу факт эмас, лекин кўпроқ ҳақиқатга яқин кўринади», — дейди у.

Июнь ойи бошида Tesla асосчиси ва бош директори компания раҳбариятига иқтисодга нисбатан «жуда ёмон кайфиятда» эканини айтганди.

Reuters томонидан кўрилган мактубида у электр транспорт воситалари ишлаб чиқарувчи ишчиларнинг тахминан 10 фоизини қисқартиришга мажбур бўлганини таъкидлаган.

Рецессия — иқтисодиётда ишлаб чиқаришнинг нисбатан мўътадил, критик бўлмаган пасайиши ёки иқтисодий ўсишнинг секинлашиши.

У ишлаб чиқаришнинг қисқариши ялпи миллий маҳсулотнинг нолга тенг ўсиши ёки унинг олти ойдан кўпроқ вақт давомида пасайиши билан тавсифланади.