Ҳиндистон полицияси Amazon маҳаллий бўлими раҳбарларини интернет-дўкон орқали марихуана контрабандасида гумон қилиб, айблов қўйди. Бу ҳақда Reuters хабар бермоқда.

Маълум қилинишича, Мадхья-Прадеш полицияси 14 ноябрь куни икки эркакни 20 килограмм марихуана билан ҳибсга олган. Полиция жиноятда гумонланувчилар Amazon India’дан ушбу моддани қуритилган стевия барглари ниқоби остида контрабанда қилиш ва тарқатиш учун фойдаланаётганини аниқлаган.

Аввалроқ Amazon раҳбарлари билан гаплашган полиция маълумотларига кўра, компания сайти орқали 1 тонна марихуана тахминан 148 минг долларга сотилган.

Amazon вакили компания ноқонуний маҳсулотларни рўйхатга олиш ва сотишга рухсат бермаслигини айтиб, ҳар қандай қоидабузарлик ҳолатларида сотувчиларга нисбатан қаттиқ чоралар кўришини қўшимча қилган.

«Бизга бу ҳақда хабар берилди ва ҳозирда тергов давом этмоқда», — деди Amazon вакили марихуана контрабандаси иши бўйича.

BBCнинг ёзишича, сўнгги пайтларда Ҳиндистон ҳуқуқ-тартибот идоралари гиёҳванд моддаларни олиб кириш ва тарқатишга қарши курашни кучайтирган. 2020 йилдан бери кўплаб таниқли ҳинд актёрлари ва телебошловчилари гиёҳванд моддаларни назорат қилиш ходимларининг кузатуви остида бўлиб келмоқда.

Аввалроқ Amazon Go ва Starbucks сотувчисиз кафе очгани ҳақида хабар берилганди.