Хитой «учлик босим» остида иқтисодиётни қўллаб-қувватлаш учун асосий ставкани пасайтирди
Декабрь ойида кўчмас мулкка инвестициялар ўтган йилга нисбатан 13,9 фоизга камайди.
Хитой Марказий банки 2020 йил апрелидан бери биринчи марта асосий фоиз ставкасини пасайтирди. Бу ҳақда Bloomberg нашри хабар берди.
Қарор Хитой Давлат статистика қўмитаси маълумотларини эълон қилиш билан деярли бир вақтда эълон қилинди. Бундан келиб чиқадики, сўнгги чоракда иқтисодий ўсиш аввалги уч ойга нисбатан секинлашган. Коронавируснинг омикрон штамми туфайли касалликларнинг янги авж олишлари фонида иқтисодиёт жадал суръатни йўқотмоқда.
Хитой Халқ банки томонидан пасайтирилган фоиз ставкаси бозор кутганидан ошиб кетди: бир йиллик ўрта муддатли кредитлаш ставкаси 2,95 фоиздан 2,85 фоизга, етти кунлик қайта сотиб олиш ставкаси (етти кунлик репо) эса 2,2 фоиздан 2,1 фоизга туширилди. Асосий ставканинг 10 та базавий пунктга туширилиши Хитой ялпи ички маҳсулоти ҳақидаги маълумотлар эълон қилинишидан бироз олдин эълон қилинди.
Маълумотлар шуни кўрсатдики, сўнгги чоракда ЯИМ 4 фоизга ўсди, бу иқтисодчиларнинг 3,3 фоизлик прогнозидан юқори, лекин ўтган чоракдагидан камроқ.
«Ўсишни кўчмас мулк сектори ва, албатта, Хитой давом эттирмоқчи бўлган ноль ковид сиёсати ушлаб туришда давом этади. Чакана савдо кўрсаткичлари истеъмолчилар учун ноль ковид сиёсати ҳали ҳам амалда эканлигини кўрсатишда давом этмоқда ва биз саноат соҳасида тикланишни кўрмаяпмиз.», — дейди Оксфорд университетининг Осиё бўйича етакчи иқтисодчиси Сиан Феннер.
Унинг ҳисоб-китобларига кўра, декабрь ойида кўчмас мулкка инвестициялар ўтган йилга нисбатан 13,9 фоизга камайди. Хитой Давлат статистика қўмитаси баёнотида айтилишича, ички иқтисодиёт уч томонлама босим остида: талабнинг қисқариши, таклиф зарбаси ва кутишларнинг заифлашиши.