KFC 2021 йил ҳар тўрт соатда янги ресторан очди
Янги KFC ресторанларининг тахминан 40 фоизи Хитойга тўғри келди.
Yum! Brands 2021 йил ҳар тўрт соатда янги KFC ресторани очди. Бу ҳақда Quartz хабар берди.
Yum! Brands компанияси — Kentucky Fried Chicken (KFC), Taco Bell ва Pizza Hut каби йирик тармоқлар эгаси 2021 йили 4200 та янги савдо нуқталарини очган. Компания бош директори Девид Гиббс кенгайишнинг бундай тезлигини саноат учун рекорд деб атаган.
«Бу бизнесдаги 32 йиллик фаолиятим давомида мен ҳеч қачон бундай нарсани кўрмаганман», — деган Гиббс компания акциядорларининг чораклик йиғилишида.
Энг катта ўсиш KFC’га тўғри келган. У 2,4 мингдан ортиқ пункт очган бўлса, 400 га яқин нуқтани ёпган. Яъни, янги KFC ресторани тахминан ҳар тўрт соатда очилган. Бошқа брендларни ҳисобга олган ҳолда, Yum! Brands ўртача ҳар икки соатда янги манзил очган.
Янги KFC очилишларининг тахминан 40 фоизи Хитойга тўғри келган. 2021 йили турли маркали муассасаларнинг ёпилиши билан Yum! Brands бутун дунё бўйлаб ресторанлар сонини 53 мингтага кўпайтирган.
Аввалроқ Хитой истеъмолчиларни KFC рекламасини бойкот қилишга чақиргани хабар қилинганди.