Mercedes-Benz EQE электромобилининг янги версиясини тақдим этди (фото)
Электр транспорт воситаларининг нархи ҳозирча номаълум.
Mercedes-Benz EQE электромобилининг янги версиясини тақдим этди. Бу ҳақда «Коммерсантъ» хабар берди.
Маълум қилинишича, Mercedes-Benz компанияси EQE электромобилининг иккита янги модификациясини тақдим этган — AMG EQE 43 4Matic ва AMG EQE 53 4Matic+.
Иккала версия ҳам тўлиқ узатма, пневматик осмали AMG Ride Control+ суспензияси, 90,6 киловатт/соат қувватга эга аккумулятор ва иккита электр мотор билан жиҳозланган. 530 километргача масофани босиб ўтишга қодир AMG EQE 43 4Matic двигателининг умумий қуввати 476 от кучига тенг, AMG EQE 53 4Matic+ эса 626 от кучли электродвигателларга эга.
Двигателлардан ташқари совитиш тизими такомиллаштирилган, суспензия модернизация қилинган ва тормозлар мустаҳкамланган. Электромобиллар махсус аэродинамик кузов тўплами ва янги дискаларга эга бўлган, интерьер эса янги безак вариантлари ва махсус AMG режимлари билан мултимедиа тизимининг ўзига хос графикасини олган. Янги модификациялар бойроқ базавий пакет билан ажралиб туради.
:no_upscale()/imgs/2022/02/16/07/5240707/bff973f5e43f8dc1dd1795589e83bc351cd82719.jpg)
Mercedes-AMG EQE’нинг иккала версияси савдолари Европада 2022 йилда бошланади. Электр транспорт воситаларининг нархи ҳозирча айтилмаган.
Аввалроқ Mercedes ёнғин хавфи туфайли 800 мингдан ортиқ автомобилини «чақириб олиши» хабар қилинганди. Шунингдек, Mercedes-Benz тўла қувват билан 1000 километр босиб ўтадиган электромобилни тақдим этгани ҳақида хабар берилди.
