Миграция агентлиги Жанубий Кореяда ишлашни режалаштираётганларга мурожаат билан чиқди
Мамлакатга борганлар аввалгидек 14 кун эмас, балки 10 кунлик карантин даврини ўтайди
Жанубий Кореяга Ўзбекистондан Е-9 ишчи визаси билан келган меҳнат мигрантларини қабул қилиш жараёни тикланиши кутилмоқда. Бу ҳақда Ўзбекистон Ташқи меҳнат миграция агентлиги хабар берди.
Корея Бандлик ва меҳнат вазирлиги расмий баёнотига кўра, 2021 йилнинг ноябрь ойи охирида ишчи кучи жўнатувчи барча давлатлар, шу жумладан Ўзбекистондан Е-9 ишчи визаси билан меҳнат мигрантларини қабул қилиш жараёни тикланиши режалаштирилган.
Кореяда ишлашни режалаштираётган фуқаролардан:
- Кореяда тан олинган вакциналар (Astrazeneca, Moderna, Pfizer, Sinovac, Sinopharm, Janssen)дан бири билан Кореяга кириб боришдан камида 14 кун олдин тўлиқ эмланган бўлиши;
- Кореянинг Ўзбекистондаги элчихонаси томонидан тан олинган лабораториялар (Korea No 1 Laboratory, SWISS LAB, De Factum Laboratories, INTERMED Innovation)дан бирида Кореяга кириб боришдан олдин 72 соат ичида ПЦР тест топширган бўлиши ва тест натижаси манфий бўлиши талаб этилади.
Шунингдек, Кореяга кириб борган меҳнат мигрантлари аввалгидек 14 кун эмас, балки 10 кунлик карантин даврини ўташи лозим бўлади.
Корея Инсон ресурсларини ривожлантириш хизматининг маълум қилишича, Ўзбекистондан меҳнат мигрантларининг Е-9 ишчи визаси билан кириб бориш тартиби ва сони бўйича маълумот Кореянинг Ўзбекистондаги EPS маркази орқали қўшимча етказилади.
Аввалроқ «Микрокредитбанк» ўз мижозларига мурожаат билан чиққани хабар қилинганди. Шунингдек, Ўзбекистон аэропортларида мультипортли бошқарув тизими жорий этилиши ҳақида хабар берилди.