Британиялик ва эронлик миллиардер Фарҳод Мошири Алишер Усмоновнинг USM ҳолдинги директорлар кенгашини тарк этди. Бу ҳақда компания матбуот хизмати хабар берди.

Маълум қилинишича, британиялик ва эронлик бизнесмен Фарҳод Мошири (бойлиги 2,2 миллиард доллар) USM ҳолдинги директорлар кенгашини тарк этган. Қарор 2 мартдан кучга кирган.

Бундан олдин, 28 февраль куни Европа Иттифоқи Украинадаги «ҳарбий операция» туфайли Россияга қарши янги санкциялар эълон қилган эди. Ушбу санкциялар бошқа тадбиркорлар қаторида миллиардер ва USM асосчиси Алишер Усмоновни четлаб ўтмади.

Тадбиркор томонидан асос солинган «Металлоинвест» компанияси вакили Усмоновга нисбатан қўлланган санкцияларни «асоссиз ва адолатсиз» деб атади. Forbes’нинг 2021 йилги рейтингида Усмоновнинг бойлиги 18,4 миллиард долларга баҳоланган.

Таъкидлаш керакки, санкциялар қўлланганидан сўнг USM «ИКС Холдинг» IТ гуруҳидан чиқишга қарор қилди. Шунингдек, Англиянинг «Эвертон» футбол клуби USM билан ҳомийлик шартномаларини тўхтатди. Бундан ташқари, Германия расмийлари Гамбург кемасозлик заводидаги Усмоновнинг 600 миллион долларлик «Дилбар» яхтасини тўсиб қўйди.