Молия вазирлиги ФНҚИЗни сотиб олган офшор компанияга қарашли корхонага ишончли бошқарувчи сифатида лицензия берди
Вазирлик корхонанинг аризаси кўриб чиқилиб, «Лицензия» ахборот тизими орқали лицензия берилганини маълум қилди.
Кипр офшор зонасида рўйхатдан ўтган Belvor Holding Limited (собиқ Jizzakh Petroleum) компаниясига қарашли Sanoat Energetika Guruhi МЧЖ ХКга қимматли қоғозлар бозорида инвестиция активларининг ишончли бошқарувчиси сифатида лицензия берилди. Бу ҳақда Молия вазирлиги матбуот хизмати хабар қилди.
Қайд этилишича, Sanoat Energetika Guruhi МЧЖ ХКнинг қимматли қоғозлар бозорида инвестиция активларининг ишончли бошқарувчиси сифатида профессионал фаолиятларни амалга ошириш учун берган аризаси кўриб чиқилди
Молия вазирлигининг тегишли қарори билан Sanoat Energetika Guruhi МЧЖ ХКнинг қимматли қоғозлар бозорида инвестиция активларининг ишончли бошқарувчиси сифатида профессионал фаолиятни амалга ошириш учун лицензия берилди.
Аввалроқ Sanoat Energetika Guruhi МЧЖ ХК Фарғона нефтни қайта ишлаш заводини 100 миллион долларга сотиб олганди.
Sanoat Energetika Guruhi ҳақида
Sanoat Energetika Guruhi МЧЖ ХК Ўзбекистондаги энг йирик хусусий вертикал интеграциялашган нефть ва газ компанияси ҳисобланади. Айни пайтда компания ер қаъридан фойдаланиш ҳуқуқига эга бўлган 103 та конга эгалик қилади ва нефть қазиб олишнинг тахминан 80 фоизини ва тасдиқланган газ захираларининг тахминан 22 фоизини ташкил қилади.
Sanoat Energetika Guruhi Кипр офшор зонасида рўйхатдан ўтган Belvor Holding Limited (собиқ Jizzakh Petroleum) компаниясига қарашли. Корхона раҳбари Шокир Файзуллаев бўлиб, у аввал «Ўзбекнефтгаз» акциядорлик жамияти раиси ва иқтисодиёт вазири ўринбосари лавозимларида ишлаб келган.
Нефть ва газ қазиб олишдан ташқари, компания бензин, дизел, нефть, авиация керосини ва бошқа бир қатор юқори қўшилган қийматга эга маҳсулотлар ишлаб чиқаради. Корхона Ўзбекистондаги стратегик лойиҳаларда, жумладан, нефть қазиб олишни кўпайтириш лойиҳаларида иштирок этади.
