Кипр офшор ҳудудида рўйхатдан ўтган компанияга қарашли корхона ФНҚИЗни 100 млн долларга сотиб олди
Инвестиция мажбуриятларидан ташқари, харидор бир қанча ижтимоий мажбуриятларни ҳам қабул қилади.
Кипр офшор зонасида рўйхатдан ўтган Belvor Holding Limited (собиқ Jizzakh Petroleum) компаниясига қарашли Sanoat Energetika Guruhi МЧЖ ХК Фарғона нефтни қайта ишлаш заводини 100 миллион долларга сотиб олди.
Ўзбекистон Давлат активларини бошқариш агентлиги ҳузуридаги UzAssets инвестиция компанияси «Фарғона нефтни қайта ишлаш заводи» МЧЖ устав фондидаги UzAssets’нинг 100 фоиз улушини 100 миллион долларга сотиш тўғрисида мамлакат нефть ва газ соҳасидаги энг йирик хусусий корхона Sanoat Energetika Guruhi МЧЖ ХК билан келишувга эришганини эълон қилди.
Олинган таклифларни ўрганиш натижаларини ҳисобга олган ҳолда, ҳамда:
- белгиланган малака талабларига мувофиқлиги;
- ҳудуд нефть ва газ саноатидаги катта тажрибаси;
- завод фаолияти учун зарур бўлган хом ашё конларининг мавжудлиги;
- корхонанинг баҳосидан юқори сотиб олиш нархини тақдим этгани сабабли Sanoat Energetika Guruhi МЧЖ ХК компанияси очиқ савдо жараёни натижалари ғолиби сифатида танланган.
Битим доирасида харидор заводни модернизация қилиш, шунингдек:
- замонавий ва экологик тоза бензин, Евро-5 талабларига жавоб берадиган дизел ёқилғиси;
- Жет а-1 реактив ёқилғиси;
- суюлтирилган табиий газ ишлаб чиқаришни кўпайтириш;
- нефт агрегатларини модернизация қилиш;
- ишлаб чиқариш қувватини камида 2 миллион тоннага оширишни таъминлашни ташкил этиш учун 380 миллион доллардан ортиқ инвестиция мажбуриятларини бажаришни ўз зиммасига олади.
Инвестиция мажбуриятларидан ташқари, харидор қуйидаги ижтимоий мажбуриятларни ҳам қабул қилмоқда:
- 2 йил мобайнида корхонада мавжуд иш ўринларини ва ишчилар сонини сақлаб қолиш (табиий сабаблар билан бўшайдиган иш ўринлари бундан мустасно), амалдаги иш ҳақи фонди миқдорини камайтирмаслик ва жамоа шартномаси шартларини ёмонлаштирмаслик;
- ходимларнинг иш ҳақларини битим имзолаш санасидаги миқдордан камайтирмаслик;
- жамоа шартномасининг асосий шартлари сақланишини таъминлаш;
- бошқа ижтимоий мажбуриятларни максимал даражада сақлаш.
Фарғона нефтни қайта ишлаш заводи ҳақида
Корхона мамлакатдаги дастлабки ишлаб чиқариш қуввати 6,5 миллион тоннани ташкил этадиган энг йирик нефтни қайта ишлаш заводларидан бири бўлиб, унинг тарихи 1959 йилдан бошланади, 1907 йилда ишга туширилган Олти-Ариқ ёқилғи ишлаб чиқариш қуввати шулар жумласидандир.
Ўтган асрнинг 60-йилларида ФНҚИЗ Ғарбий Сибир конларидан хом ашё билан таъминланган, шунингдек, бутун собиқ Совет хом ашёсини қайта ишлаш тизимининг бир қисми бўлган. 20 йил давомида заводда модернизация ва реконструкция ишлари амалга оширилмаган.
Заводнинг тўлиқ ишлаши учун асосий қийинчиликлардан бири бу Ўзбекистон ҳудудида хом ашёнинг етишмаслигидир. COVID-19 пандемияси корхонанинг молиявий фаолиятига ҳам салбий таъсир кўрсатиб, нефть таъминотининг етишмаслигини оширди ҳамда нефть маҳсулотларига талабни камайтирди. Сўнгги 10 йил ичида йилига ўртача 1-1,5 миллион тонна нефть қайта ишланган, мисол учун 2020 йилда атиги 900 минг тонна хом ашё қайта ишланган, холос.
Sanoat Energetika Guruhi ҳақида
Sanoat Energetika Guruhi МЧЖ ХК Ўзбекистондаги энг йирик хусусий вертикал интеграциялашган нефть ва газ компанияси ҳисобланади. Айни пайтда компания ер қаъридан фойдаланиш ҳуқуқига эга бўлган 103 та конга эгалик қилади ва нефть қазиб олишнинг тахминан 80 фоизини ва тасдиқланган газ захираларининг тахминан 22 фоизини ташкил қилади.
Корхона раҳбари Шокир Файзуллаев бўлиб, у аввал «Ўзбекнефтгаз» акциядорлик жамияти раиси ва иқтисодиёт вазири ўринбосари лавозимларида ишлаб келган.
Нефть ва газ қазиб олишдан ташқари, компания бензин, дизел, нефть, авиация керосини ва бошқа бир қатор юқори қўшилган қийматга эга маҳсулотлар ишлаб чиқаради. Корхона Ўзбекистондаги стратегик лойиҳаларда, жумладан, нефть қазиб олишни кўпайтириш лойиҳаларида иштирок этади.