«Нархларни сунъий ушлаб туриб, кўзбўямачилик ёки ура-урачиликка йўл қўйиб бўлмайди» — Президент
Паррандачилик хўжаликлари билан учрашувларда 20 дан ортиқ муаммо ва таклифларни кўтарилган.
Нархларни сунъий ушлаб туриб, бу масалада кўзбўямачилик ёки ура-урачиликка йўл қўйиб бўлмайди, деди Президент аҳолини озиқ-овқат билан таъминлаш бўйича видеоселектор йиғилишида.
Шавкат Мирзиёевнинг таъкидлашича, «асосий мақсад — аҳолини рози қилиш эканини бир зум ҳам унутмаслик лозим».
Президент матбуот котибининг ёзишича, «барча шароитлар яратиб берилганига қарамай», 8 та вилоятда парранда гўштини етиштириш аҳоли талабининг 70 фоизини ҳам таъминламаётгани танқид қилинган.
Паррандачилик хўжаликлари билан учрашувларда 20 дан ортиқ муаммо ва таклифларни кўтарилган.
«Паррандачилик йўналишидаги 50 дан зиёд йирик корхона 50 фоиз қувватда ишламоқда. Сабаби — ҳудудларда лойиҳаларни танлаш ва жойлаштириш ишлари тўғри йўлга қўйилмаган», дейилади хабарда.
Матбуот котибининг таъкидлашича, бугунги кунда бир дона тухумнинг ўртача таннархи 1 минг сўм бўлса, унинг улгуржи нархи 900 сўмдан ошмаяпти.
«Паррандачилик корхоналари раҳбарлари вазиятни тушуниб, тухум нархини оширмаяпти, бунинг учун уларга раҳмат. Лекин қайси вилоят, туман ва шаҳар ҳокими улар билан учрашиб, озуқа ем, транспорт, айланма маблағ масалаларида ёрдам бераяпти, деган саволга, афсуски, ижобий жавоб йўқ», — деди Президент.
Аввалроқ ғалла нархининг эркинлаштирилиши ун нархининг ошишига олиб келмаслиги маълум қилинганди.