Германиянинг собиқ канцлери Герхард Шредер «Газпром» директорлар кенгашига номзод сифатида илгари сурилди. Бу ҳақда компания баёнотига таяниб РБК хабар берди.

Қайд этилишича, компания томонидан тасдиқланган номзодлар рўйхатида Kazenergy ассоциацияси раиси Тимур Кулибаев, Қозоғистоннинг собиқ Президенти Нурсултон Назарбоевнинг куёви йўқ. Ўтган ҳафтада у ҳукумат томонидан компания директорлар кенгашига номзод сифатида кўрсатилганди.

Губкин номидаги Россия Давлат университети ректори Виктор Мартинов, Россия халқ хўжалиги ва давлат бошқаруви академияси ректори Владимир Мау, «Газпромбанк» бош директори Андрей Акимов, Россия Президентининг махсус вакили Виктор Зубков, саноат ва савдо вазири Денис Мантуров, «Газпром» бошқаруви раиси Алексей Миллер ва бош вазир ўринбосари Александр Новак ҳам кенгаш аъзолигига номзод сифатида кўрсатилган. 30 июнь куни Санкт-Петербургда «Газпром» акциядорлари йиғилиши бўлиб ўтади.

Январь ойи бошида Қозоғистонда оммавий тартибсизликларни бостириш ортидан Назарбоев оиласининг кўплаб аъзолари ва оилага алоқадор амалдорлар ишдан бўшатилганди.

Тимур Кулибаев собиқ Президентнинг ўртанча қизи Динара билан турмуш қурган. 17 январь куни у «Атамекен» миллий тадбиркорлар палатаси раҳбари лавозимини тарк этди.

Бунгача Назарбоевнинг яна икки куёви — собиқ Президентнинг кенжа қизи Алия билан оила қурган, «КазТрансОйл» акциядорлик жамияти бошқаруви раиси Димаш Досанов ва Назарбоевнинг тўнғич қичи — Дариға билан норасмий никоҳда бўлган Кайрат Шарипбаев QazaqGaz миллий компанияси бошқаруви раиси лавозимидан кетди.