Brent фючерслари 2014 йилнинг кузидан бери биринчи марта 95 доллардан ошди. Бу ҳақда «РБК» хабар берди.

Маълум қилинишича, Brent маркали нефтнинг бир баррели нархи 95 доллардан ошган, бу 2014 йилнинг кузидан бери энг юқори кўрсаткичдир. Нефть геосиёсий таранглик, жумладан Украина атрофидаги, ортиб бораётган бир пайтда кўтарилмоқда.

Қайд этилишича, 11 февраль кунги савдоларда Brent нефтининг 2022 йил апрели учун етказиб бериладиган фючерслари 4 фоиздан кўпроққа ошиб, 95 доллардан қимматроққа сотилган. Бу 2014 йил октябрь ойидан бери энг юқори кўрсаткичдир.

Нефть нархи сўнгги бир неча ҳафта ичида таклиф танқислиги ва талабнинг тикланиши фонида ўсиб бормоқда. Хом ашё нархининг ошишига Шарқий Европа ва Яқин Шарқдаги геосиёсий таранглик сабаб бўлмоқда.

Жумладан, 11 февраль куни кечқурун Россиянинг Украинага бостириб кириши кутилаётгани ҳақидаги хабарлар фонида нефть, доллар ва евро ҳам кўтарилган. АҚШ Россия президенти Владимир Путин аллақачон ҳужум ҳақида қарор қабул қилган ва бу ҳақда ҳарбийларни огоҳлантирган, деб ҳисоблайди

JPMorgan таҳлилчилари Украина атрофида кучайиб бораётган кескинлик туфайли Россия нефти экспортининг икки баравар қисқариши натижасида жанговар ҳаракатлар содир бўлган тақдирда, Brent нархи бир баррель учун 150 долларга етиши мумкинлигини тахмин қилган.

Таъкидланишича, Brent нефти бир баррелининг тарихий максимал нархи — 147,50 доллар — 2008 йилнинг июлида қайд этилган.

Шунингдек, 2021 йил август ойидан бошлаб ОПЕК+ 2020 йилда талаб кескин пасайганидан сўнг жорий этилган нефть қазиб олиш бўйича чекловларни юмшатмоқда. 2 февраль куни ОПЕК+ йиғилиши иштирокчилари март ойида ишлаб чиқариш квотасини кунига 400 минг баррелга ошириш бўйича қарор қабул қилган.

Аввалроқ Saudi Aramco Осиё ва АҚШ учун нефть нархини ошириши хабар қилинганди. Шунингдек, Дунёнинг энг йирик нефть компанияси 50 миллиард долларлик акцияларини сотиши ҳақида хабар берилди.