Тошкент шаҳридаги Нефть ва газ конлари геологияси ҳамда қидируви институти давлат муассасаси биноси сотувга қўйилди. Сотув тўғрисидаги маълумотлар «E-AUKSION» порталига жойлаштирилди.

Маълумотларга кўра, бинонинг бошланғич нархи 43 миллиард 505 миллион 588 980 сўм этиб белгиланган. Вазирлар Маҳкамасининг 2021 йил 20 майдаги тегишли қарори хусусийлаштириш учун асос қилиб олинган. Ер участкасининг эгаллаган умумий майдони 0,82 гектарни ташкил этади.

Қайд этилишича, Солиқ кодексининг 256-моддасига асосан давлат мол-мулки сотилганда ушбу мол-мулкни сотиб олган харидор солиқ агенти ҳисобланади (объектнинг баҳолаш пайтида ҚҚС қўшиб ҳисобланган ҳолатлар ва Якка тартибдаги тадбиркор бўлмаган жисмоний шахслар бундан мустасно). Ушбу давлат объекти бўйича олди-сотди шартномаларини тузиш аукцион савдолари ўтказилган кундан кейин 10 кундан ортиқ бўлмаган муддатда амалга оширилиши лозим.

Давлат объектининг олди-сотди шартномаси аукцион савдолари ўтказилган кундан кейин, 10 кун муддат ичида, сотувчи, балансда сақловчи ва аукцион савдоларининг ғолиби ўртасида олди-сотди шартномаси расмийлаштирилмаса, автоматик тарзда ғолибдан кейинги иштирокчига тасдиқлаган нархи бўйича мазкур объект бўйича олди-сотди шартномасини тузиш таклифи берилади. Бундай ғолиб мавжуд бўлмаганда такрорий аукцион савдоларига чиқарилади.

Аввалроқ «Сувмаш»нинг 47 фоиз акция пакети сотувга қўйилганди. Шунингдек,  «Фарғонаазот»нинг устав капиталидаги акция пакетлари хусусийлаштирилиши ҳақида хабар берилди.