Иқтисодий тараққиёт вазирлиги томонидан 1–20 декабрь кунлари Қўйлиқ ва Чорсу деҳқон бозорларида асосий истеъмол товарларининг улгуржи нархлари бўйича кузатув натижалари эълон қилиниб борилди. Вазирлик асосий турдаги қишлоқ хўжалиги ва гўшт маҳсулотларининг улгуржи нархлари ўзгариши юзасидан таҳлилий маълумот берди. 

Арзонлашган маҳсулотлар 

Ушбу давр мобайнида бозорда картошка 125 сўмга, сариқ сабзи 1350 сўмга, қизил сабзи 1100 сўмга, импорт олма 1500 сўмга, узум (ризамат) 10 минг сўмга, апельсин 11 минг сўмга, лимон 2500 сўмга ва ловия 500 сўмга арзонлаган. 

Қимматлаган маҳсулотлар 

Бозорларда бақлажон 14 минг 750 сўмга, саримсоқ пиёз 11 минг сўмга, булғор қалампири (қизил) 8500 сўмга, булғор қалампири (яшил) 7750 сўмга, нок (маҳаллий) 6500 сўмга, нок (импорт) 4000 сўмга, бодринг 3875 сўмга, помидор 750 сўмга, нўхат 1500 ва гуруч (аланга) 250 сўмга ошган. 

Бозорларга энг кўп келтирилган маҳсулотлар 

Тезкор маълумотларга асосан, Қўйлиқ бозорига 1–20 декабрь кунлари ҳудудлардан жами 13,3 минг тонна, хусусан, 7,4 минг тонна картошка, 4,0 минг тонна пиёз, 674 тонна карам ва 1,2 минг тонна сабзи келтирилган. 

Шундан, Тошкент вилоятидан 489 тонна картошка, 850 тонна пиёз, 674 тонна карам, 493 тонна сабзи, Самарқанд вилоятидан 250 тонна картошка, 1615 тонна пиёз, Жиззах вилоятидан 1570 тонна пиёз, Қашқадарё вилоятидан 233 тонна, Сурхондарё вилоятидан 297 тонна ва Сирдарё вилоятидан 169 тонна сабзи маҳсулотлари етказиб берилган. 

Шунингдек, Қўйлиқ бозорига Қозоғистондан 2286 тонна, Қирғизистондан 392 тонна, Афғонистондан 2109 тонна ва Эрондан 1873 тонна картошка келтирилган. 

Шу билан бирга, ҳудудлардан Чорсу деҳқон бозорига 1–20 декабрь кунлари жами 254,3 тонна, шу жумладан, 216,1 тонна мол гўшти ва 38,2 тонна қўй гўшти келтириб сотилган. 

Аввалроқ Ўзбекистон марказий деҳқон бозорларидаги минимал-максимал нархлар маълум қилингани ҳақида хабар берилди.