Ўзбекистон GSP+ Преференциялар бош тизими бенефициари мақоми сабаб ЕИга экспортни сезиларли оширди
Инвестициялар ва ташқи савдо вазирлигида Европа Иттифоқининг Ўзбекистондаги делегацияси раҳбари Шарлотт Адриан билан учрашув бўлиб ўтди.
Европа Иттифоқининг GSP+ Преференциялар бош тизими бенефициари мақоми туфайли Ўзбекистон маҳсулотларини Европа бозорига экспорт қилиш ҳажми 56 фоизга ошди. Бу ҳақда Европа Иттифоқининг Ўзбекистондаги делегацияси раҳбари Шарлотт Адриан ҳамда Инвестициялар ва ташқи савдо вазирлиги вакиллари ўртасидаги учрашувда маълум қилинди.
Қайд этилишича, 2022 йилнинг биринчи чорагида Ўзбекистон ва ЕИ ўртасида товар айланмасининг 30 фоизга ўсиши, шу жумладан, Европа Иттифоқининг GSP+ Преференциялар бош тизими бенефициари мақоми туфайли Ўзбекистон маҳсулотларини Европа бозорига экспорт қилиш ҳажми 56 фоизга ошиши кузатилган.
Шунингдек, йиғилишда республиканинг ЖСТга қўшилиши бўйича ишчи гуруҳининг 5-йиғилишини ўтказиш масалалари, бўлажак Ўзбекистон — Европа Иттифоқи ҳамкорлик қўмитаси йиғилишининг кун тартиби ва томонларни қизиқтирган бошқа масалалар муҳокама қилинган.
Музокаралар якунида томонлар Ўзбекистон ва Европа Иттифоқи ўртасидаги ҳамкорликни янада кенгайтиришга қаратилган қўшма ташаббус ва дастурларни амалга оширишни жадаллаштиришга келишиб олгани маълум қилинди.
Маълумот учун, Ўзбекистонда 2022 йил 1 апрелдан бошлаб Европа Иттифоқи давлатларига маҳсулот экспорт қилувчиларга субсидия берилади. Бу ҳақда Президентнинг 2022 йил 28 январдаги «2022–2026 йилларга мўлжалланган Янги Ўзбекистоннинг тараққиёт стратегияси тўғрисида»ги фармонида белгилаб қўйилган.