«Ўзбекистон республика товар-хом ашё биржаси»нинг барча савдо платформаларида 8–14 ноябрь кунлари 1 триллион 690,8 миллиард сўмлик товарлар сотилган бўлиб, бу аввалги ҳафтага нисбатан 2,4 фоизга пастдир. Бу ҳақда «Ўзбекистон республика товар-хом ашё биржаси» матбуот хизмати хабар берди.

Маълум қилинишича, сотувларнинг 82,7 фоизи биржа савдолари, 0,1 фоизи кўргазма-ярмарка савдолари, 16,7 фоизи электрон давлат харидлари ва 0,4 фоизи авторақамларнинг онлайн-аукционига тўғри келган.

Биржанинг шакар бозорида нархлар пасайиши қайд этилган. Ҳафта давомида биржа савдоларига 9198 тонна шакар қўйиогвн ва улардан 8005 тоннаси, яъни 87 фоиз қисми сотилган.

Кўриб чиқилаётган даврда шакарнинг барча категорияси бўйича шаклланган кунлик ўртача нархлар маҳсулотнинг бир тоннаси учун 8320,5 сўмдан 7847,4 сўмгача, яъни 5,7 фоизга пасайган. Ўтказилган биржа савдолари натижасида маҳаллий шакарнинг 3-категорияси бўйича шаклланган ўртача ҳафталик нархи маҳсулотни бир тоннаси учун 8201,8 сўмни ташкил этган.

Шунингдек, биржа савдоларига 4760 тонна суюлтирилган газ қўйилган ва ундан 4644 тоннаси, яъни 97,6 фоизи ҳажми сотилган. Ўтказилган савдоларда ҳар куни ўртача 142 харидор иштирок этган.

Кўриб чиқилаётган даврда суюлтирилган газнинг ўртача кунлик нархи маҳсулотнинг бир тоннаси учун 4321,4 минг сўмдан 4026,7 минг сўмга, яъни 6,8 фоизга пасайган. Кўриб чиқилаётган даврда суюлтирилган газнинг ўртача ҳафталик котировкаси 4208,4 сўмни ташкил этди.

Аввалроқ ҳам Ўзбекистон товар-хом ашё биржасида шакар ва суюлтирилган газ нархи пасайгани ҳақида хабар берилганди.